رووداو دیجیتاڵ
فەرماندەیی هێزەکانی پاراستنی گەل (هەپەگە) ناسنامه‌ی چوار گەریلای پارتی کرێکارانی کوردستان (پەکەکە) ئاشكرا ده‌كات كه ساڵێک لەمەوبەر لە ئەنجامی شه‌ڕ و پێكدادان له دژی سوپای تورکیا لە نێو خاکی هەرێمی کوردستاندا گیانیان لەدەستداوە.
رۆژی 7ـی ئابی 2023، ناوەندی راگەیاندن و چاپه‌مه‌نیی هێزەکانی پاراستنی گەل (هەپەگە) ناسنامەی ئەو گەریلانەی بڵاوکردەوە، کە لە رۆژی 8ـی ئابی 2022، لە ناوچەی گارە لە هەرێمی کوردستان لە کات شەڕ و پێکدادان لە دژی سوپای تورکیا، لە چوارچێوەی ئۆپەراسیۆنی ناسراو بە چنگ – قوفڵدا گیانیان لەدەستدابوو.
ناسنامەی گەریلاکان وەک هەپەگە بڵاویکردووەتەوە، ئەمانەن: فەریهان ئیسماعیل ناسراو بە نۆرشین عەفرین لەدایکبووی عەفرین، جەلال بیردال ناسراو بە سیدار سەرحەد لەدایکبووی ئاگری، جەیلان عەبدوڵڵا ناسراو بە زیلان عەفرین لەدایکبووی عەفرین و ئەحمەد سلێمان ناسراو بە لاڤانت قامشلۆ، لەدایکبووی قامشلۆ.
رۆژی 5ـی ئابی 2023 وەزارەتی بەرگریی تورکیا لە هەژماری تایبەتی خۆی لە تۆڕی کۆمەڵایەتیی ئێکس (تویتەری پێشوو) راگەیێندراوێکی بڵاوکردەوە و گوتی، لە رووبەڕووبوونەوەیەکیاندا لە ناوچەی زاپ، دوو گەریلای پەکەکە گیانیان لەدەستداوە و دوو کچە گەریلاش بە برینداری کەوتوونەتە دەستیان.
ئەم شەڕ و پێکدادانە لە چوارچێوەی ئۆپەراسیۆنێکدایە کە تورکیا ناوی ناوە چنگ- قوفڵ و بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.
وەزارەتی بەرگریی تورکیا گیانلەدەستدانی 609 گەریلا و کوژرانی 94 سەربازی سوپای وڵاتەکەی راگەیاندووە؛ هەپەگەش کوژرانی دوو هەزار و 978 سەربازی تورکیا و گیانلەدەستدانی 359 گەریلای راگەیاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ