لە هەڵەبجە سێ تۆمەتبار بە چوار کیلۆ TNT و چەندین چەکی بێ مۆڵەت دەستگیردەکرێن

 

بەڕێوەبەرایەتیی ئاسایشی گشتیی سلێمانی ئەمڕۆ (چوارشەممە، 09-08-2023) لە راگەیێندراوێکدا دەڵێ، هێزەکانی ئاسایش دوای  لێکۆڵینەوە و بەدەستهێنانی زانیاری، بە بڕیاری دادوەری لێکۆڵینەوەی ئاسایش لە رۆژی 7ـی ئابی 2023، سێ تۆمەتباریان لە پارێزگای هەڵەبجە دەستگیرکرد، کە کاری قاچاخچیێتی کڕین و فرۆشتنی چەک و تەقەمەنیی نایاساییان کردووە. 

 

بەڕێوەبەرایەتی ئاسایشی گشتیی سلێمانی دەڵێت "دوای دەستگیرکردنی تۆمەتباران، بە بڕیاری دادوەری لێکۆڵینەوە، پشکنین بۆ ماڵ و دووکانی تۆمەتباران کراوە، لەئەنجامدا دەست گیراوە بەسەر "چوار کگم  تی ئێن تی و 53 پارچە چەکی مامناوەند و چەکی راو، 10 بۆمبی دەستی لە جۆری نارنجۆک، نزیکەی دوو هەزار فیشەکی جۆراوجۆر و چوار دووربینی سەر چەک."

 

بەگوێرەی راگەیێندراوەکەی ئاسایشی سلێمانی ئەو سێ تۆمەتبارە بە ناوەکانی (س. م. م. )، (ڕ. م. ع. ) و (ج. ک. ع.) بەپێی مادەی 15ـی چەک راگیراون و لێکۆڵینەوە لەگەڵیاندا بەردەوامە.