باڵیۆزی بەریتانیا: هێرشەکەی سەر شاری هەولێر قبوڵنەکراوە
رووداو دیجیتاڵ
باڵیۆزی بەریتانیا لە عێراق سەرکۆنەی هێرشەکەی شەوی رابردووی سەر هەولێر دەکات و دەڵێت، هێرشێکی دیکەی قبوڵنەکراوە و دەردەکەوێت ئامانج لێی خەڵکی سڤیل بێت.
مارک بڕایسن ریچاردسن، باڵیۆزی بەریتانیا لە عێراق لە هەژماری خۆی لە تویتەر نووسیویەتی: "نابێت عێراق ببێتە شوێنی برەودان بە پشێوی و پەرگیری."
بەگوێرەی راگەیێندراوێکی دژەتیرۆری کوردستان، کاتژمێر 9:35ی شەو رابردوو "درۆنێکی بۆمبڕێژکراو خۆی کێشا بەسەر رێگای پیرمام هەولێر و لە ئاکامدا سێ هاووڵاتی بە سووکی بریندار بوون و زیانی ماددییش بە خواردنگەیەک و چەند ئۆتۆمبێلێک کەوت.
دوای هێرشەکە مەسرور بارزانی، سەرۆکی هەرێمی کوردستان بە تەلەفۆن قسەی لەگەڵ مستەفا کازمی، سەرۆکوەزیرانی عێراق کرد، دواتر مەسرور بارزانی لە تویتێکدا رایگەیاند: "هاوئاهەنگییەکی باش لە نێوان هەولێر و بەغدا ھەیە بۆ به‌ره‌نگاربوونه‌وه‌ی کەس و گرووپە تاوانبارەکان."
بەم هێرشەی شەوی رابردوو، لە ماوەی نزیکەی یەک ساڵ و نیوی رابردوودا 12 جار هێرش کراوەتە سەر شاری هەولێر و دەوروبەری. دوایینجار کە بە درۆن هێرشکرایە سەر شاری هەولێر لە 11ی ئەیلوولی 2021 بوو، هێرشەکەش بۆ سەر فڕۆکەخانەی هەولێر بوو، بەبێ ئەوەی هیچ زیانێکی گیانی لێبکەوێتەوە.