رێگەوبانی گەرمیان: 71٪ی رێگەی کەلار - دەربەندیخان تەواوکراوە

 

 

عەدنان خەلیل، بەڕێوەبەری رێگەوبانی گەرمیان لەکاتی بەشداریکردنی لە بەرنامەی مژار لە رادیۆی رووداو کە رۆژانە محەممەد رەحیم پێشکێشیدەکات رایگەیاند، "لەدوای سەردانی قوباد تاڵەبانی، جێگری سەرۆکوەزیران بۆ گەرمیان و بەسەرکردنەوەی پرۆژەی رێگەی کەلار - دەربەندیخان بەشێوەیەکی مەیدانی، کۆمپانیای جێبەجێکار بەچڕی دەستی بە کارکردن کردووەتەوە لە پرۆژەکەدا."

 

بەگوتەی بەڕێوەبەری رێگەوبانی گەرمیان، پرۆژەی رێگەی کەلار - سلێمانی ئەو بەشەی کە دەکەوێتە سنووری کاری بەڕێوەبەرایەتییەکەیانەوە لە کەلارەوە بۆ دەربەندیخان دەست پێدەکات و تائێستا رێژەی 71٪ی پرۆژەکە جێبەجێکراوە و لە 20ی نیسانەوە کۆمپانیای جێبەجێکار بەچڕی دەستی بەکارکردن کردووەتەوە، بەشێوەیەک لە هەموو بڕگەکانیدا کار دەکرێت.

 

رێگەی دێلێژە - سەنگاو، راستەوخۆ قەزای کفری دەبەستێتەوە بە پارێزگای سلێمانییەوە، لە ناحیەی سەنگاو بۆ دێلێژە نزیکەی پێنج کیلۆمەتری ماوە قیرتاو بکرێت.

 

عەدنان خەلیل ئاماژەی بەوەکرد، بڕی ملیارێک و 100 ملیۆن دینار بۆ قیرتاوکردنی ریگەی دێلێژە – سەنگاو تەرخانکراوە و بەشێوەی جێبەجێکردنی راستەوخۆ لەلایەن رێگەوبانی گەرمیانەوە جێبەجێ دەکرێت، لە 10ی ئازارەوە دەستبەکار بوون لە پرۆژەکەدا و کاری تێدا دەکەن.

 

لەبارەی رێگەی گوندەکانی سنوورەکە، بەڕێوەبەری رێگەوبانی گەرمیان گوتی، زۆرینەی گوندەکانیان تۆڕی رێگەوبانیان نییە، داوایان کردووە لە سنووری کەلار و کفری و خانەقین رێگەوبانی گوندەکان دروست بکرێت.

 

گوتیشی، بارانی هەفتەی رابردوو زیانی بە چەند رێگە و پردێکی سنوورەکە گەیاندووە. پردی ناحیەی سەرقەڵا و ئاوبارەی گوندی عەوڵڵا قوت، بەهۆی بارانەوە زیانیان پێگەیشتووە و ئەوان دەرخستەی پرۆژەکەیان ئاراستەی وەزارەتی ئاوەدانکردنەوە کردووە بۆ ئەوەی رەزامەندی لەسەر بدرێت.

 

ئاماژەی بەوەشکرد، رێگەی گوندەکان زۆرینەیان هێشتا خاکی و گڵن، وەکو رێگەوبانی گەرمیانیش بەگوێرەی توانا و کەرەستەی بەردەستیان کاری چاککردنەوە بۆ رێگەوبانەکان دەکەن.