سامان سەنگاوی: لە فەتواکانی رابردووم تەوبەم کردووە و وازیشم لە سیاسەت هێناوە

 

 

سامان سەنگاوی، پێشنوێژ و گوتارخوێنی مزگەوتی حاجی تەها قەویلەیی لە سلێمانی، لەبارەی هەندێک فەتوا و هەڵوێستی خۆی لە رابردوودا، ئێستا "تەوبە"ی کردووە و بە رووداوی گوت "پێشتر کۆمەڵێک فەتوام داوە وەکو (حەڵاڵبوونی گۆرانی گوتنی ئافرەتان، نەبوونی سزای نێو گۆڕ، بەسەرچوونی چەند ئایەتێک و دەنگدان بە حیزبێکی ئۆپۆزیسیۆنی پێشوو وەکو جیهاد)، ئێستا لە سەرجەمیان پەشیمانم و داوای بەخشینم لە خودای خۆم کردووە و نامەوێت جارێکی دیکە بەو رێگە هەڵەیەدا بڕۆمەوە".

 

لەبارەی چۆنێتی و هۆکاری تەوبەکردنەکەشی گوتی "ویستم ریفۆرم لە ئایینی ئیسلامدا بکەم، بەڵام سەرکەوتوو نەبووم. بیرم کردەوە و بەخۆمدا چوومەوە، دیراسەی زیاتری قورئان و فەرموودەم کردەوە و ئەنجامەکەشی پەشیمانیم بوو لە چەند فەتوا و هەڵوێستێکم".

 

سامان سەنگاوی، پێشتر لایەنگری حیزبێکی سیاسی بووە و دواتریش ماوەی چەند رۆژێک پەیوەندیی بە حیزبێکی دیکەوە کردووە و وەکو خۆی دەڵێت، "تەنیا یەک هەفتە ئەندامی حیزب بووە، دواتر وازیهێناوە".

 

ناوبراو ئاماژەی بەوەش کرد "ئیسلام یەک ناوە، ئەو هەموو حیزب و گرووپە رێگەپێدراو نییە، هەموو گرووپ و حیزبەکان، باش و تووندڕەویان تێدایە، سەرەڕای رەخنەی زۆرم لەسەریان، بەڵام بە برای خۆمیان دەزانم".

 

سامان سەنگاوی، لە ساڵی 1977 لە ناحیەی سەنگاوی سەر بە قەزای چەمچەماڵ لەدایکبووە، پەیمانگەی گوتاربێژیی لە سلێمانی خوێندووە و ئێستا پێشنوێژ و گوتاربێژی مزگەوتی حاجی تەها قەویلەییە لە سلێمانی.