شەهێن دوو ساڵە لەنێو جێگەیە
رووداو دیجیتاڵ
ژنێکی نەخۆش لە گوندێکی سنووری رواندز ماوەی دوو ساڵە لەنێو چوار دیواری ژوورێکدا لەسەر پشتە و لەسەر قەرەوێڵەیەک لەگەڵ ئازارەکانی، ژیان بەڕێدەکات.
شەهێن محەممەد، تەمەنی 33 ساڵە و دایکی سێ منداڵە، دوو ساڵ پێش ئێستا، ئازارێک لە بڕبڕەی پشتی و سەردانی بۆ لای دکتۆر، راستیی نەخۆشییەکی کوشندەیان بۆ دەرخست کە بڵاوبوونەوەی شێرپەنجە بوو لە بەشی زۆری جەستەیدا.
شەهێن محەممەد، بەمشێوەیە باسی چیرۆکی خۆی بۆ رووداو دەکات: دوو ساڵە نەخۆشیی شێرپەنجەم گرتووە، لە هەموو ژیان بووم، لە خواردن لە خەو لە دانیشتن و لەهەموو شتێک. جاری وا هەبووە بە هەفتە ئاگام لە منداڵی خۆم نەبووە. داوا لە خێرخوازان دەکەم یارمەتیم بدەن تاوەکو بگەڕێمەوە نێو ماڵ و منداڵی خۆم و، هەستمەوە سەر پێیەکانم، هیچی دیکەم ناوێت.
دۆخی دارایی خێزانەکەی شەهێن، خراپە؛ هاوسەری پێشمەرگەیە و هەژاری و نەداری وای کردووە چەندین جار دەرمان و چارەسەرییەکانیان دوابخەن، لەگەڵ ئەوەشدا هەر شوێنێکیان شک بردبێت بۆ چارەسەری نەخۆشییەکەی، سەردانیان کردووە.
تاهیر ئیبراهیم، خاڵی شەهێنە و دەڵێ "ئێمە وەکو کەسوکاری شەهێن هەرچی پێمان کرابێت، کردوومانە؛ سەردانی هەولێر و سلێمانی و هەموو شوێنێکمان پێ کردووە، هەر پزیشکێک گوتبێتیان باشە چووینەتە لای، هیچ سوودی نەبینیوە و رۆژ بۆ رۆژ دۆخی تەندروستیی خراپتر دەبێت."
دوایین هەواڵی خۆش کە بەم نەخۆشە دراوە، پێیان گوتووە 'چارەسەرت لە وڵاتی هیندستان هەیە.' بەڵام تێچووی زۆر بۆ گەیشتنی بە هیندستان و نەبوونی پارە، دەستەوەستانی کردوون.
دکتۆر سۆران زراری، پسپۆری نەخۆشییەکانی هەناو لەبارەی نەخۆشییەکەی شەهێنەوە دەڵێ "چارەسەری هەیە بێگومان، زۆر گرنگە پابەندبێت بە رێنماییەکانی دکتۆر، چارەسەرییەکانی هەندێک گرانن و هەندێکیشی لە دەرەوەی وڵاتن، هەندێکیشی لە نێوخۆی کوردستان دەکرێت کە حکومەت دەرمانەکان دابین دەکات."
دوورەدەستی و درەنگگەیشتن بە نەخۆشخانەکان، خەمێکی دیکەی ئەو خێزانەیە، بەو پێیەی هەردوو شەو جارێک دەبێت بۆ دەرکردنی ئاو لە سنگی، ئەم نەخۆشە ببەن بۆ سۆران، لەکاتێکدا خۆیان دانیشتووی گوندێکی سەر بە رواندزن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ