کامێرامانێکی کەناڵی ئێن ئاڕ تی لە چیای پیرەمەگروون هەڵدێرا و گیانی لەدەستدا

 

 

لە راگەیێندراوێكدا کەناڵی ئێن ئاڕ تی رایگەیاند، وێنەگرێکیان بەناوی ئەحمەد عەلی، کە ئامادەکاری بەرنامەی "سەرکێشی"ی کەناڵەکە بووە، ئەمڕۆ بە مەبەستی تۆمارکردنی بەرنامەیەک چووەتە سەر چیای پیرەمەگروون و کەوتووەتە خوارەوە و گیانی لەدەستداوە.

 

رائید ئارام عەلی، گوتەبێژی بەرگریی شارستانیی سلێمانی بە تۆڕی میدیایی رووداوی گوت، دوای ئاگاداربوونیان لە رووداوەکە، تیمیان چوونەتە شوێنەکە و تەرمی ئەحمەد عەلی-یان گەیاندووەتە نەخۆشخانەی شار لە سلێمانی.

 

کاروان ئەنوەر، سکرتێری لقی سلێمانی/سەندیکای رۆژنامەنووسانی کوردستان بە تۆڕی میدیایی رووداوی گوت، ئەوان بەردەوام بۆ خۆپاراستنی رۆژنامەڤانان خولی هۆشیارییان هەبووە، بەڵام زیاتر هۆشیارییەکان بۆ خۆپارێزیی رۆژنامەڤان بووە لەکاتی شەڕ و ئاڵۆزییەکاندا.

 

ئەحمەد عەلی ساڵی 1978 لەدایکبووە و باوکی دوو منداڵە، لە ساڵی 2016وە وەکو وێنەگر کاری بۆ کەناڵەکەی کردووە.