پێنتاگۆن: هیچ بنکەیەکمان لە کۆبانێ نییە

رۆژی چوارشەممە، 08ـی کانوونی دووەمی 2025، سابرینا سینگ، جێگری گوتەبێژی وەزارەتی بەرگریی ئەمریکا لە کۆنفرانسێکی رۆژنامەڤانیدا رایگەیاند: "هەندێ راپۆرت باس لەوە دەکەن گوایە ئەمریکا بنکەیەک لە کۆبانێ دادەنێت، ئەوە راست نییە. هەسەدە لەو ناوچانە چالاکن و هەروەکو دەزانن ئەرکی ئێمە رووبەڕووبوونەوەی داعشە و پێگەکانمان زیاتر لە بەشی رۆژهەڵاتی ئەو وڵاتەن." 

 

گوتەبێژی پێنتاگۆن باسی لە ئەرکی سەربازیی ئەمریکا لە رۆژئاوای کوردستان و سووریا کرد و گوتی: "ئەرکی هێزەکانمان لە سووریا هیچ گۆڕانکارییەکی بەسەردا نەهاتووە، تاکە ئەرکی ئێمە لە سووریا لەنێوبردنی داعشە و هەر بۆیەش هێزەکانمان لەوێن." 

 

لەبارەی پەیوەندییەکانیان لەگەڵ هێزەکانی سووریای دیموکرات "هەسەدە"، لە سووریا، سابرینا سینگ گوتی: "ئێمە وەکو هاوبەش کار لەگەڵ هەدەسە دەکەین، بەڵام ئەوەش گرنگە تاکە هۆکاری بوونی ئێمە لە سووریا و ئەرکمان لەنێوبردنی داعشە، جا ئەوە ئۆپەراسیۆنی هاوبەش بێت یان ئەو لێدانانەی هەمانە." 

 

ئەمریکا لە رابردوودا رایگەیاندووە تەنیا 900 سەربازی لە رۆژئاوای کوردستان و سووریا هەیە، بەڵام لەدوای رووخانی دەسەڵاتی بەشار ئەسەد و دروستبوونی گرژیی و ئاڵۆزییەکانی باکووری سووریا لەنێوان گرووپە چەکدارەکانی نزیک لە تورکیا و هەسەدە، پێنتاگۆن زیادبوونی ژمارەی سەربازانی لە سووریا راگەیاند و ئاماژەی بەوە کرد نزیکەی 2 هەزار سەربازیان لەو وڵاتە هەیە. 

 

رۆژی پێنجشەممە، 02ی کانوونی دووەمی 2025، چەندین میدیا بڵاویانکردەوە، ئەمریکا دیواری کۆنکرێتی لە حەسەکەوە بۆ کۆبانێ دەگوازێتەوە بۆ ئەوەی بنکەیەکی سەربازی لەوێ دابنێت.