رووادو دیجیتاڵ
ئەندامێکی تیمی کوردستانی عێراقی رێکخراوی (CPT)ـی ئەمریکی رایگەیاند لە ساڵی 2023دا هێزەکانی تورکیا زیاتر لە 1500 جار هێرشیان کردووەتە سەر پارێزگاکانی هەرێمی کوردستان. دەشڵێت: "بەهۆی هێرشەکانەوە 11 هاووڵاتی شەهید بوون و 13ـی دیکەش بریندار بوون."
رۆژی سێشەممە، 9-1-2024، کامەران عوسمان، ئەندامی تیمی کوردستانی عێراقی رێکخراوی (CPT)ـی ئەمریکی لەبارەی هێرش و بۆردوومانەکانی سوپای تورکیا لە هەرێمی کوردستان، بەتۆڕی میدیایی رووداوی گوت: "لە ساڵی 2023دا هێزەکانی تورکیا هەزار و 548 جار هێرش و بۆردوومانی خاکی هەرێمی کوردستان و نەینەوایان کردووە."
کامەران عوسمان ئاماژەی بە وردەکاریی ئەو هێرشانە دا و گوتی: "1159 هێرش لە رێگەی فڕۆکەی جەنگی، 228 هێرش لە رێگەی درۆن، 114 هێرش لە رێگەی تۆپباران، سێ هێرش لە رێگەی تەقەکردن و دوو جاریش لە رێگەی تەقینەوەی مین بووە."
سەبارەت بە دابەشبوونی هێرش و پەلامارەکان بەپێی پارێزگاکانی هەرێمی کوردستان روونیکردەوە: "لە پارێزگای هەولێر: 475 هێرش، لە پارێزگای دهۆک 517 هێرش، لە پارێزگای سلێمانی 420 هێرش و لە پارێزگای نەینەواش: 36 بۆردوومان و هێرش هەبووە."
ئەم شەڕ و پێکدادانە لە چوارچێوەی ئۆپەراسیۆنێکدایە، کە تورکیا ناوی ناوە چنگ- قوفڵ و لە بەرەبەیانی رۆژی 18-4-2022 لە ناوچەکانی ئاڤاشین، مەتین و زاپ لە خاکی هەرێمی کوردستان، بۆ سەر پێگەکانی پەکەکە دەستیپێکردووە و تائێستاش بەردەوامە. وەزارەتی بەرگریی تورکیا گیانلەدەستدانی نزیکەی 840 گەریلا و کوژرانی نزیکەی 120 سەربازی سوپای وڵاتەکەی راگەیاندووە؛ هەپەگەش کوژرانی نزیکەی سێ هەزار سەربازی تورکیا و گیانلەدەستدانی نزیکەی 400 گەریلای راگەیاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ