سەرۆکی تەمەنی پەرلەمان داوای کۆبوونەوە دەکات و دیوانی پەرلەمان بە "ناپەیڕەویی" دەزانێت

 

محەممەد سلێمان، سەرۆکی یەکەم دانیشتنی پەرلەمانی کوردستان ئەمڕۆ یەکشەممە، 08-12-2024، رایگەیاند: "داوا لە ئەندامانی پەرلەمانی کوردستان دەکەین، سێشەممە 10-12-2024 کاژێر 11:00 لە هۆڵی پەرلەمان ئامادە بن بۆ هەڵبژاردنی دەستەی سەرۆکایەتیی پەرلەمان".

 

هیوا نەسرەدین، جێگری سەرۆکی دیوانی پەرلەمانی کوردستان ئەمڕۆ یەکشەممە بە تۆڕی میدیایی رووداوی گوت: "ئێمەش بانگهێشتەکەمان بینیوە، بەڵام سەرۆکی تەمەنی پەرلەمان بە فەرمی ئێمەی ئاگادار نەکردووەتەوە، کە بەگوێرەی پەیڕەو دەبووایە بە ئێمە بڵێت ئامادەکاری بۆ بکەین".

 

هیوا نەسرەدین گوتی: "ئێمە ئاگادارنین لەو بانگهێشتە، بۆیە ناپەیڕەوییە و پەرلەمانتارانیش ئەگەر راگەیێندراوی بانگهێشتنامە لە سایتی پەرلەمان بڵاونەبێتەوە ئامادەی کۆبوونەوە نابن".

 

02-12-2024، یەکەم دانیشتنی خولی شەشەمی پەرلەمانی کوردستان کرا، تێیدا بۆ پۆستی سەرۆکی پەرلەمانی کوردستان پارتی دیموکراتی کوردستان دوو بەربژێری هەبوون، ئەوانیش ڤالا فەرید و هەڵگورد شێخ نەجیب. یەکێتیی نیشتمانیی کوردستانیش بە هەمان شێوە دوو کەسی بۆ پۆستەکە بەربژێر کرد، کە میران محەممەد و شاڵاو کۆسرەت رەسوول بوون. نەوەی نوێش بەربژێرێکی بۆ سەرۆکی پەرلەمان هەیە، کە کوردەوان جەمالە.

 

بۆ جێگری سەرۆکی پەرلەمانیش هەریەکە لە بەهجەت عەلی و مەرد عەلی رەسوول لە پارتی دیموکراتی کوردستان، ئومێد حەمەساڵح و ئازاد حەمەئەمین لە یەکێتیی نیشتمانیی کوردستان، هەروەها عەدنان حوسێن لە نەوەی نوێ خۆیان بەربژێر کرد.

 

بۆ پۆستی سکرتێری پەرلەمانیش لە یەکێتی، شیرین یونس و شلێر غەفوور. هاڤین سەعید لە پارتی، سەوسەن کاکەمەند، لە نەوەی نوێ، نەجدەت نووری پێکهاتەی تورکمان لە سلێمانی و رامی نووری لە پێکهاتەی کریستیانەکان لە هەولێر، بەربژێرن.

 

جێگری سەرۆکی دیوانی پەرلەمانی کوردستان دەڵێت: "بەگوێرەی پەیڕەی نێوخۆی پەرلەمان، جارێکی دیکە دەرگەی خۆپاڵاوتن بۆ دەستەی سەرۆکایەتی پەرلەمانی کوردستان ناکرێتەوە و دەبێت ئەوانەی خۆیان بەربژێر کردووە، یەکێک لەوانە هەڵبژێردرێت بۆ پۆستەکانی سەرۆک، سکرتێر و جێگری سەرۆکی پەرلەمانی کوردستان".

 

لە هەڵبژاردنی پەرلەمانی کوردستاندا کە 20-10-2024 بەڕێوەچوو، پارتی دیموکراتی کوردستان زۆرترین کورسی بەدەستهێنا کە 39 کورسی بوو. دوای ئەویش یەکێتیی نیشتمانیی کوردستان 23 کورسی و نەوەی نوێ بە 15 کورسییان بەدەستهێنا.