لە ورمێ دەست بەسەر بڕێکی زۆر کەلوپەلی قاچاخدا گیرا

 

 

ئێوارەی دوێنێ پێنجشەممە 08-11-2024 کیومەرس پاکدڵ، بەڕێوەبەری پۆلیسی شاری خۆی سەر بە پارێزگای ورمێی رۆژهەڵاتی کوردستان رایگەیاند، لە چوارچێوەی بەرەنگاربوونەوە و نەهێشتنی کاڵای قاچاخدا، تیمەکانیان دەستیان بەسەر بڕێکی زۆر کاڵادا گرتووە کە لە رێگەی ماکۆی پارێزگاکەوە بەرەو تەورێز و جولفای ئێران دەبردران.

 

کیومەرس پاکدڵ گوتی، تیمەکانیان بارهەڵگرێکیان پشکنیوە و بڕێکی زۆر جلوبەرگ، کەرەستەی ئۆتۆمبێل، کەرەستەی نێوماڵ، قوماش، رەنگ، کەرەستەی کشتوکاڵی، کێبل، کەرستەی کارەبایی و چەندین جۆر دەرمانی تێدا بووە. 

 

بەڕێوەبەری پۆلیسی شارەکە ئاماژەی بەوە کرد، ''دوای بەدواداچوونمان، دەرکەوت سەرجەم کاڵاکان قاچاخن و هیچ مۆڵەتێکی گومرگیان نییە، بۆیە دەستیان بەسەردا گیرا.''

 

بەگوتەی کیومەرس پاکدڵ، بەهای کەلوپەلە قاچاخەکە دەگاتە زیاتر لە 290 هەزار دۆلار (20 ملیار تمەن) و پەیوەست بە دۆسیەکەش، دەست بەسەر بارهەڵگرەکەدا گیراوە و شۆفێرەکەشی دەستگیرکرا.

 

پارێزگای ورمێی رۆژهەڵاتی کوردستان بەهۆی هاوسنووریی لەگەڵ تورکیا، هەرێمی کوردستان و ئازەربایجان، وەک شوێنێکی ترانزێت بۆ قاچاخی کاڵا بەکاردەهێنرێت.

 

بەگوێرەی راپۆرتێکی بەڕێوەبەرایەتیی گشتیی پیشەسازی، کانزا و بازرگانیی پارێزگاکە، لە سەرەتای نەورۆزەوە تاوەکو 21-10-2024، 419 دۆسیەی تایبەت بە کاڵای قاچاخ کراونەتەوە کە بەگشتی بەهای کاڵاکان دەگاتە نزیکەی هەزار و 300 ملیار تمەن (زیاتر لە 18 ملیۆن دۆلار).