بەشی هەڵبژاردنی یەکێتی: سێ هەزار فەرمانبەر راژەکانیان گواستووەتەوە بۆ کەرکووک

 

لەماوەی حەوت ساڵی ئیدارەکەی راکان جبووری، کە بە وەکالەت پارێزگار بوو؛ ئاسانکاری بۆ گواستنەوەی راژەی ئەو فەرمانبەران کراوە کە لە پارێزگاکانی دیکە دامەزراون و هێنراونەتە کەرکووک.

 

لەو ماوەیەدا زیاتر لە 800 فەرمانبەر راژەکانیان گواستووەتەوە کۆمپانیای نەوتی باکوور و، ئێستا داوا دەکەن لە بڕیاری دابەشکردنی زەوی بەسەر فەرمانبەران، بێ بەش نەکرێن.  

 

شێرزاد سەمەد، بەرپرسی هەڵبژاردنی یەکێتی لە کەرکووک دەڵێ "دامودەزگا حکومییەکانی ئەم شارە هەمووی سەر بە حکومەتی عێراقن و بە چەند رێکارێک گواستنەوەی راژەکان کراوە، بەڵام زۆرترین گواستنەوەیان لە کۆمپانیای نەوتی باکوور بووە، ئەمەش وایکردووە تائێستا ژمارەی کورد زۆر کەم بێت لەو کۆمپانیایە."  

 

گواستنەوەی راژە لەنێوان فەرمانگە حکومییەکانی کەرکووک هیچ رێگرییەکی نییە و، خەڵکێکی زۆر لە بەغدا و پارێزگەکانی دیکە دادەمەزرێن، دواتر راژەکەیان دەگوازنەوە بۆ کەرکووک.  

 

ئەنجوومەنی پارێزگای کەرکووک بەنیازە، رێگری لە گواستنەوەی راژەی فەرمانبەران بکات، بەڵام بەهۆی پێکنەهێنانی لیژنەکانی نێو ئەنجوومەنەکە، تائێستا نەتوانراوە هیچ هەنگاوێک بنرێت.  

 

ئەحمەد کەرکووکی ئەندامی ئەنجوومەنی پارێزگای کەرکووک بە رووداوی گوت "ئەوەی سەرژمێریی 1957ـی کەرکووکی نەبێت، بە کورد، عەرەب و تورکمان، ناتوانێت لەم شارەدا لە زەوی سوودمەند بێت، بەتایبەت کار دەکەین لەسەر بابەتی کەرکووک و بەپێی یاسا رێکیدەخەینەوە، بڕیاری لەسەر دەدەین و ناهێڵین هیچ شتێک لەدەرەوەی یاسا تێپەڕێت."

 

بەپێی بڕیاڕی 419ـی ئەنجوومەنی وەزیرانی عێراق، زەوی بەسەر هەموو فەرمانبەرانی حکومی دابەشدەکرێت؛ لە کەرکووک ژمارەیەکی زۆر فەرمانبەر مامەڵیان پێشکێش کردووە، کە خەڵکی کەرکووک نین و بوونەتە رێگر لەبەردەم دابەشکردنی زەوی.