رووداو دیجیتاڵ
دەسەڵاتیی فڕۆکەوانی مەدەنی عێراق، بەشێوەیەکی مەیدانی پشکنین و وردبینی بۆ فڕۆکەخانەی نێودەوڵەتیی هەولێر کرد.
بەگوێرەی راگەیێندراوێکی دەسەڵاتیی فڕۆکەوانی مەدەنیی عێراق، کە دووشەممە 07-10-2024 بڵاوکراوەتەوە، بە بڕیاری بەنگین رێکانی، سەرۆکی دەسەڵاتی فڕۆکەوانیی مەدەنیی عێراق، ئاسایشی فڕۆکەوانیی مەدەنی بەردەوامە لە گەڕانە مەیدانییەکانی بۆ پشکنین و وردبینی لە سەرجەم فڕۆکەخانەکانی عێراق لە نێویاندا فڕۆکەخانەی نێودەوڵەتیی هەولێر.
دەسەڵاتیی فڕۆکەوانی مەدەنی دەڵێت، ئەو کارە پاڵپشتە بە رێنماییەکانی رێکخراوی فڕۆکەوانیی مەدەنیی نێودەوڵەتی lCAO، ئەوەش لە چوارچێوەی پاشکۆی حەڤدەی ئاسایش و راسپاردەکانی رێبەری ئاسایشیی فڕۆکەوانی مەدەنیی دایە. ئەو کارەش بۆ جێبەجێکردنی داواکاری پرۆگرامی نیشتمانییە، بە مەبەستی چاودێریی کوالیتی ئاسایشی فڕۆکەوانی.
دەسەڵاتی فڕۆکەوانیی مەدەنی جەخت لەوەدەکاتەوە، فڕۆکەخانەی نێودەوڵەتی هەولێر لە 2023وە لە ژێرباری رێکارەکانی وردبینی رێکخراوی نێودەوڵەتی فڕۆکەوانیی مەدەنییە.
لە عێراق شەش فڕۆکەخانەى مەدەنی هەن، کە گەشتى نێوخۆیی و دەرەکییان لێوە دەکرێت، کە پێکهاتوون لە فڕۆکەخانەکانى بەغدا، هەولێر، سلێمانى، کەرکووک، نەجەف و بەسرە. بڕیاریشە ساڵی داهاتوو فڕۆکەخانەکانی موسڵ، کەربەلا و زیقار بکرێنەوە.
فڕۆکەخانەی نێودەوڵەتیی هەولێر لە ساڵی 2003 لە هەمان شوێنی فڕۆکەخانەی کۆن دامەزرا، کە پێشتر لە سەردەمی رژێمی بەعسدا تاوەکو ساڵی 1991 وەک بنکەیەکی سەربازی بەکارهاتووە، فڕۆکەخانەکە خزمەتگوزاری و بینا بنەڕەتییەکانی لەخۆگرتبوو؛ تێرمیناڵی گەشتیار، بینای بارهەڵگر، شوێنی وەستانی فڕۆکە، و فرگەیەکی فڕین بە درێژی (2800) مەتر و پانی 30 مەتر.
یەکەم گەشتی بازرگانی لە 15ی کانوونی دووەمی 2003 لە فڕۆکەخانەی نێودەوڵەتیی هەولێر نیشتەوە، بەڵام لە 29ی نیسانی 2005 بە فەرمی کرایەوە و لە 26ی ئایاری 2005 کۆدی ICAO (ORER)ی وەرگرت.
فڕگەی فڕۆکەخانەی نێودەوڵەتیی هەولێر کە درێژییەکەی 4800 مەتر و پانی 75 مەترە، لە ریزی 10 درێژترین فڕگەی فڕینی جیهاندایە. تێرمیناڵی گەشتیارەکان توانای خزمەتکردنی 4 ملیۆن و 500 هەزار گەشتیاری هەیە لە ساڵێکدا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ