ئالان یاسین.
رووداو دیجیتاڵ
گەنجێکی تەمەن 36 ساڵی نابیست و ناگۆ، بەگوتەی کەسوکارەکەی چەند کەسێک رێگەیان پێگرتووە و لێیانداوە، بەهۆیەوە پەنجەیەکی دەستی شکاوە و پشت و سنگیشی ئازاری پێگەیشتووە.
ئالان یاسین، لە تەمەنی نۆ مانگییەوە باوکی گیانی لەدەستداوە و دایکی لە دەربەندیخان بە تاقانەیی بەخێویکردووە، نزیکەی هەفتەیەکە ژیانی هاوژینی لەگەڵ کچێکی نابیست و ناگۆ پێکهێناوە.
رووداوەکە لە دەربەدنیخان بووە و بۆچارەسەر هێنراوەتە نەخۆشخانەی شاری سلێمانی. دایکی باس لە چۆنییەتی رووداوەکە دەکات.
کەژاڵ رەشید، دایکی ئالانە و دەڵێت: "کوڕەکەم رۆشتووە بۆ ناو بازاڕ بۆ کاری چاککردنەوەی سەتەلایت، بەڵام لە رێگە ئەم کەسانە دێنە سەر رێگەی و سووکایەتی پێدەکەن و شەڕی لەگەڵ دەکەن، بە کورسی لێیدەدەن، بۆیە داواکارم لە سەرکردەی حیزبەکان و رێکخراوەکانی مافی کەمئەندامان و نابیستان لەسەرمان بێنەدەنگ و مافەکانمان بپارێزن."
دوو کەس بەتۆمەتی شەڕکردن لەسەر ئەو رووداوە دەستگیرکراون و لێکۆڵینەوەش لە رووداوەکە دەکرێت، بۆئەوەی بزانرێت هۆکاری سەرەکی چی بووە.
سەرکەوت ئەحمەد، گوتەبێژی پۆلیسی سلێمانی دەڵێت: "دوو کەس بە بڕیاری دادوەر دەستگیرکراون و تاوەکو 11ی ئەم مانگە بەنددەکرێن و دۆسیەکە رێڕەوی یاسایی خۆی وەرگرتووە."
رووداوەکە ئێوارەی رۆژی چوارشەممە بووە و کەسوکاری گەنجە نابیستەکە داواکارن بکەران بە سزای یاسایی خۆیان بگەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ