لە پاوە کۆڵبەرێک کوژرا و شەشی دیکە بریندار بوون

 

بەرەبەیانی ئەمڕۆ دووشەممە، هێزەکانی ئێران لە ناوچە سنوورییەکانی نەوسوود سەر بە شاری پاوە تەقەیان لە ژمارەیەک کۆڵبەر کرد و بەهۆیەوە حەوت کۆڵبەر بریندار بوون. یەکێک لە کۆڵبەرەکان بە ناوی ئەیوب محەممەدی دوای گەیاندنی بە نەخۆشخانەی پاوە بەهۆی سەختی برینەکەی گیانی لەدەستدا.

 

ئاژانسی کۆڵبەر نیوز کە هەواڵی تایبەت بە کۆڵبەران بڵاودەکاتەوە، رایگەیاند، هەر حەوت کۆڵبەرەکە خەڵکی گوندی زیرانن لە ناوچەی کڵاشی جوانڕۆ و شەش کۆڵبەرەکەی دیکەش لە نەخۆشخانەی پاوە چارەسەر دەکرێن.

 

بەپێی ئاماری ئەو ئاژانسە، لە شەش مانگی یەکەمی ئەم ساڵدا 34 کۆڵبەر لە سنوورەکانی رۆژهەڵاتی کوردستان گیانیان لەدەستداوە و 236 کەسیش بریندار بوون. 20 کەس لەو کۆڵبەرانە تەمەنیان خوار 18 ساڵە.