گومرگی کرماشان: لە مانگێکدا بە بەهای زیاتر لە 230 ملیۆن دۆلار هەناردەمان هەبووە

 

 

عەلی ئەسغەر عەباسزادە، بەڕێوەبەری گومرگی کرماشان و سەرپەرشتیاری گومرگەکانی ئەو پارێزگایە، رۆژی سێشەممە 7ی ئایاری 2024 ئامارێکی نوێی لەبارەی قەبارەی هەناردەکردنی شتومەک لە رێگەی گومرگ و دەروازە سنوورییەکانی ئەو پارێزگایە بڵاوکردەوە و رایگەیاند، لە مانگی یەکەمی بەهاری ئەم ساڵدا واتە لە 21-03-2024 تاوەکو 21-04-2024، لە پارێزگای کرماشانەوە بڕی 490 هەزار و 575 تۆن کەلوپەل، بە بەهای 230 ملیۆن و 520 هەزار دۆلار هەناردەی دەرەوەی وڵات کراوە.

 

عەلی ئەسغەر عەباسزادە گوتی، بەراورد بە هەمان ماوەی پار، هەناردەکردنی کەلوپەل لە رێگەی گومرگ و دەروازە سنوورییەکانی کرماشان لەڕووی کێشەوە 6% و لەڕووی نرخەوە 17% زیادیکردووە.

 

گوتیشی، زۆربەی ئەو کەلوپەلانەی لە کرماشانەوە هەناردەی دەرەوە کراون، بریتین لە، ئاسن، کاشی، سیرامیک، بەردی بیناسازی، بەرهەمە پلاستیکییەکان، بەرهەمە شیرەمەنییەکان، سەوزە و میوە.

 

بەڕێوەبەری گومرگی کرماشان ئاماژەی بە قەبارەی هەناردەکردنی ساڵی پاریش کرد و رایگەیاند، ساڵی رابردوو بڕی حەوت ملیۆن و 273 هەزار تۆن شتومەک، کە بەهاکەی دەکاتە زیاتر لە سێ ملیار و 400 ملیۆن دۆلار، لە رێگەی گومرگ و دەروازە سنوورییەکانی پارێزگاکەوە هەناردە کرا.

 

بە گوتەی عەلی ئەسغەر عەباسزادە، ئەو بڕە لە هەناردەکردن، بەراورد بە دوو ساڵ پێشتر لەڕووی کێشەوە 7% و لەڕووی نرخیشەوە 27% زیادیکردووە.

 

ئەوەشی خستەڕوو، زیاترین هەناردە لە دەروازەی سنووریی پەروێزخان بووە و دوای ئەویش، دەروازە سنوورییەکانی خوسرەوی، سومار، شێخ سڵە و شوشمێ دێن.