کۆمپانیای کۆکەرەوەی زبڵ و خاشاک لە دەربەندیخان مانیگرتووە
رووداو دیجیتاڵ
شەقام و کۆڵانەکانی دەربەندیخان پڕبوون لە زبڵ و خاشاک. ئەو کۆمپانیای کە ئەرکی کۆکردنەوەی زبڵ و خاشاکە لەو قەزایە، 10 رۆژە کارناکەن و شارەکەیان بەجێهێشتووە. پێشتر رۆژانە 100 تۆن زبڵ و خاشاکیان لە دەربەندیخان و دەروبەری کۆدەکردەوە.
عوسمان حەمەئەمین، دووکاندارێکی دەربەندیخانە و دەڵێت، "خۆمان زبڵەکە فڕێدەدەین. دۆخی شارەکە رۆژێک نییە، دوو نییە؛ مانگێک نییە، دوو نییە، ئەوە چارەسەر نییە."
ئیسماعیل مەحموود، دووکاندارێکی دیکەیە و دەڵێت، "زبڵەکە کاریگەری هەیە. هەموو کەس نەخۆشە ئەوەش دەبێتە دەردێکی تر و بارگرانییەکی تر لەسەر خەڵک. ئەوە چ دیاردەیەکی ناشرینە؟"
عەلی مەحموود، کرێکارێکی دەربەندیخانە و گوتی، "زبڵەکە بۆنی زۆرە. جارێ هاوین نەهاتووە بۆنی بەوجۆرەیە. زبڵەکە کاریگەری هەیە لەسەر خەڵک، هەموومان منداڵی وردمان هەیە تووشی نەخۆشی دەبن."
ناو بەناو شارەوانی دەربەندیخان هەڵمەتی پاککردنەوەی شار ئەنجامدەدەن، بەڵام توانا و ئامێرەکانی شارەوانی، زۆر کەمترە لەو زبڵ و خاشاکە زۆرەی رۆژانە فڕێدەدرێت.
عوسمان عەبدوڵڵا، سەرۆکی شارەوانی دەربەندیخان دەڵێت، "ئامێری پێویستمان نییە، کرێکاری پاککەرەوەمان نییە، تەنیا یەک کرێکاریشمان نییە و ئامێری کۆکەرەوەی خۆڵ و خاشاکمان نییە یان دەبێت کۆمپانیا بگەڕێتەوە یان دەبێت سێکتەری خزمەتگوزاری بگەڕێتەوە، واتا هەموو شتەکانی دیکە."
کۆمپانیای ئۆرانۆس ئەرکی پاککردنەوەی دەربەندیخان و 13 شارەوانی دیکەی سنووری سلێمانی لە ئەستۆدایە. کۆمپانیاکە دەڵێن، هەشت مانگە شایستە داراییەکانیان پێنەدراوە سکاڵای یاساییان تۆمارکردووە، تاوەکو یەکلاکردنەوەی دۆسییەکەیان بڕیاریان داوە کارەکانیان لە هەموو شارەوانییەکان رابگرن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ