لە ورمێ 11 کەس بە رووداوی هاتووچۆ بریندار بوون

 

 

ئەمڕۆ دووشەممە، حەمید مەحبووبی، بەڕێوەبەری کۆمەڵەی مانگی سووری پارێزگای ورمێ رایگەیاند، لە رێگەی نێوان شارەکانی بۆکان-میاندوئاو بارهەڵگرێک و ئۆتۆمبێلێکی تایبەت لە جۆری پیجۆ پێکیاندادا و بەهۆیەوە شەش کەس بریندار بوون. بریندارەکان لەلایەن تیمەکانی تەندروستی و فریاکەوتنەوە بۆ نەخۆشخانە و ناوەندە تەندروستییەکان گوێزرانەوە.

 

حەمید مەحبووبی گوتیشی، لە رێگەی شنۆ-ورمێ و لە نزیک گوندی سێلان، ئۆتۆمبێلێک لە رێڕەوەی خۆی دەرچوو و دوو برینداری لێکەوتەوە کە لە لایەن تیمەکانی فریاکەوتنەوە بۆ نەخۆشخانەی شاری شنۆ گوێزرانەوە.

 

بە گوتەی مەحبووبی، لە رێگەی نەغەدە-پیرانشاریش، بارهەڵگرێک و ئۆتۆمبێلێکی تایبەت لە جۆری پیجۆ 405 پێکیاندادا و بەهۆیەوە دوو برینداری لێکەوتەوە. تیمەکانی فریاکەوتنی شارۆچکەی جەلدیان گەیشتنە شوێنی رووداوەکە و بریندارەکانیان گواستەوە نەخۆشخانە.

 

بەڕێوەبەری کۆمەڵەی مانگی سووری ورمێ دەشڵێت، ئەمڕۆ بەهۆی وەرگەڕانی ئۆتۆمبێلێک لە رێگەی نێوان شارەکانی شنۆ-پیرانشار، نزیک لە سێڕێیانی جەلدیان هاونیشتمانییەک بریندار بوو.

 

ساڵانە لە رۆژەکانی پشووی نەورۆزدا ژمارەیەکی زۆری خەڵک لە ئێران و رۆژهەڵاتی کوردستان بە رووداوی هاتووچۆ گیانیان لەدەستدەدەن و ژمارەیەکی زۆریش بریندار دەبن.

 

ئەحمەد شیرانی، بەڕێوەبەری ناوەندی زانیاری و کۆنترۆڵی ترافیکی پۆلیسی هاتووچۆی ئێران رایگەیاند، لە سەرەتای نەورۆزەوە تائێستا 100 هەزار رووداوی هاتووچۆ لەو وڵاتە روویانداوە و بەهۆیەوە 813 کەس گیانیان لەدەستداوە و 21 هەزار و 441 کەسیش بریندار بوون.