پارێزگاکانی هەرێمی کوردستان لە وەرگرتنەوەی کارتی بایۆمەتریی دەنگدان لە یەکەمەکانی عێراقن

 

بەپێی بەدوادچوونی تۆڕی میدیایی رووداوی بۆ راپۆرتی هەفتانەی کۆمیسیۆنی باڵای سەربەخۆی هەڵبژاردنەکانی عێراق لەبارەی پێدانەوەی کارتی بایۆمەتریی دەنگدان، دەردەکەوێت هەفتەی رابردوو لە لقەکانی، هەولێر، سلێمانی و دهۆک 42 هەزار و 511 کارتی بایۆمەتریی دەنگدان دراونەتەوە (لە هەولێر 17 هەزار و 569 کارت، لە سلێمانی 12 هەزار و 585 کارت و لە دهۆک 12 هەزار و 357 کارت).

 

لە کاتێکدا لە هەر 16 لقەکەی دیکەی کۆمیسیۆن بە بەغداشەوە کە دوو لقی کۆمیسیۆنی هەیە تەنیا 9 هەزار و 30 کارت وەرگیراونەتەوە.

 

حەیدەر محەممەد، بەڕێوەبەری ئۆفیسی هەولێری کۆمیسیۆنی باڵای سەربەخۆی هەڵبژاردنەکانی عێراق، بە تۆڕی میدیایی رووداوی رایگەیاند: "تیمەکانمان و فەرمانبەرانی لقەکەمان بەردەوام کاردەکەن و رۆڵی گەورەیان لە دابەشکردنی زۆری کارتەکان هەیە." 

دەشڵێت: "ئێمە هەوڵی زۆر دەدەین و کارت دەگەیەنینە دەستی ئەو کەسانەشی ناتوانن بگەنە کۆمیسیۆن، بۆیە هەولێر یەکەمە."

 

بەپێی ئامارەکانی کۆمیسیۆن لەو هەفتەیەدا وەرگرتنەوەی کارتی بایۆمەتریی دەنگدان، کە مەرجی سەرەکیی کۆمیسیۆنە بۆ بەشداریکردن لە هەڵبژاردن لە پارێزگاکانی عێراق بەمشێوەیە بووە:

 

- بەسرە: 605 

- میسان: 688

- زیقار: 1062

- نەجەف: 440

- موسەننا: 458

- قادسیە: 472

- هەولێر: 17,569

- دهۆک: 12،357

- سلێمانی: 12،585

- نەینەوا: 576

- کەرکووک: 128

- سەڵاحەددین: 126

- ئەنبار: هیچ

- بەغدا-کەرخ: 588 

- بەغدا-رەسافە: 2037

- بابل: 622

- کەربەلا: 455

- واست: 564

- دیالە: 209

 

10ى حوزەیرانى 2024 دیاریکراوە بۆ هەڵبژاردنى پەرلەمانى کوردستان، کە لەلایەن کۆمیسیۆنى باڵاى سەربەخۆى ھەڵبژاردنەکانی عێراقەوە سەرپەرشتی دەکرێت.