رووداو دیجیتاڵ
لە بەردەم دادگەی گشتیی مێردین لە باکووری کوردستان، شەڕە تەقە لەنێوان دوو بنەماڵە دروستبوو و 10 کەس بریندار بوون.
دوای نیوەڕۆی ئەمڕۆ هەینی، لە شاری مێردینی باکووری کوردستان دوو بنەماڵەی ناکۆک بۆ چارەسەرکردنی کێشەکەی نێوانیان لە دانیشتنێکی دادگەدا ئامادە بوون.
ئەندامانی یەکێک لە بنەماڵەکە بەهۆی ناڕازیبوونیان بە بڕیاری دادوەر، لە کاتی چوونە دەرەوەیاندا، لە بەردەم دادگەکە پەلاماری ئەندامانی بنەماڵەکەی دیکەیان دا و لە ئەنجامدا شەڕە بۆکس لەنێوانیان دروستبوو.
دواتر شەڕە بۆکسەکە بۆ شەڕە چەقۆ و پاشان بۆ بەکارهێنانی چەک تەشەنەی سەند؛ لە ئەنجامدا 10 کەس بریندار بوون کە دووانیان پۆلیسی مێردین بوون.
هێزێکی زۆری پۆلیس و جەندرمە چوونە شوێنی رووداوەکە و 12 کەسیان لە هەردوو بنەماڵە دەستگیرکرد.
سەرجەم بریندارەکان بە ئەمبووڵانس رەوانەی نەخۆشخانە کران و دوو لە بریندارەکان بەهۆی بەرکەوتنی گوللـە بەر سنگیان، دۆخی تەندروستییان ناجێگیرە.
بەگوێرەی راپۆرتی 2023ـی دەزگای ئوموت بۆ بەرەنگاربوونەوەی تووندوتیژی و کەمکردنەوەی خاوەندارێتی چەک لە تورکیا، پار سێ هەزار و 773 تاوانی کوشتن بە چەک لە تورکیا و باکووری کوردستان کراون و لەو تاوانانەدا دوو هەزار و 318 کەس کوژراون و سێ هەزار و 820 کەس بریندار بوون.
بەگوێرەی دەزگای ئوموت، "بەرامبەر هەر چەکێکی بە مۆڵەت، 9 چەکی بێ مۆڵەت هەیە. لە سەرانسەری تورکیادا 4 ملیۆن چەکی مۆڵەتدراو هەیە".
بەگوێرەی راپۆرتی ساڵی 2022ی دەزگای ئوموت، لە 3 هەزار و 984 رووداوی باکووری کوردستان و تورکیادا چەک بەکارهێندراوە و لە ئەنجامدا 2 هەزار و 278 کەس کوژراون و 4 هەزار و 231 کەسی دیکەش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ