قوباد تاڵەبانی: جێگەی داخە لە كوردستان یەكڕیز و یەكگرتوو نین

 

 

ئەمڕۆ چوارشەممە، 08-03-2023، قوباد تاڵەبانی، جێگری سەرۆکوەزیرانی هەرێمی کوردستان پێشوازی لە شاندێکی پەرلەمانتارانی ئەوروپا بە سەرۆکایەتیی سارا سكيتێدال، سەرۆکی لێژنەی پەیوەندییەکانی یەکێتیی ئەوروپا لەگەڵ عێراق کرد.

 

جێگری سەرۆکوەزیرانی هەرێمی کوردستان پێیوایە ئاڵنگارییەکانی قۆناخی ئێستای هەرێمی کوردستان "خزمەتگوزاری و باشتركردنی ژیانی خەڵكن" و دەڵێت، "كات كاتی حوكمڕانیی باشە". باس لەوەش دەکات کە "جێگەی داخە لە ئێستادا لە كوردستان یەكڕیز و یەكگرتوو نین، ئەمەش هۆكاری لاوازییە لە بەغداد". 

 

بەگوێرەی راگەیێندراوێکی نووسینگەی رۆژنامەڤانیی قوباد تاڵەبانی، شاندەکەی پەرلەمانی ئەوروپا "جەختیان لە بەهێزكردنی كوردستان كردەوە لە چوارچێوەی عێراقێكی بەهێزی فیدراڵدا و ئەوەیان خستەڕوو دەخوازن پەیوەندی پتەوی راستەوخۆیان لەگەڵ هەرێمی كوردستاندا هەبێت، هەروەها ئەوەشیان بیر هێنایەوە كە سەرجەم دەسكەوتە زێڕینەكانی كوردستان لە کاتی یەكگرتوویی و تەبایی هێزە سیاسییەكانی كوردستان بەدیهاتوون."

 

جێگری سەرۆکوەزیرانی هەرێمی کوردستان لە کۆبوونەوەکەدا ئاماژەی بەوەش کردووە کە "پێویستە سەرجەم هەوڵ و كۆششەكان بۆ مسۆگەركردنی شایستە داراییەكانی هەرێمی كوردستان بێت لە بودجەی گشتی فیدراڵی لەگەڵ چارەسەركردنی كێشە كەڵەكەبووەكانی پرسی نەوت و گاز."

 

وەکو لە راگەیێندراوەکەیشدا هاتووە، "هەردوولا هاوڕابوون لەبارەی گرنگیی ئەنجامدانی هەڵبژاردنێكی پاكوبێگەرد تا ببێتە بنەمایەك بۆ نوێنەرایەتییەكی راستەقینە لە پەرلەمان و حكومەتی داهاتوو لە هەرێمی كوردستان."