رووداو - هەولێر
سەرۆكی دەستەی دەستپاكی هەرێمی كوردستان رایدەگەیێنێ، لەچەند رۆژی داهاتوودا كار و چالاكی ساڵی رابردووی دەستەكەیان ئاشكرادەكەن، ئەوەش دەخاتەڕوو هێشتا دوو وەزیری حكومەتی هەرێمی كوردستان سەروەت و سامانەكەیان ئاشكرا نەكردووە.
د.ئەحمەد ئەنوەر، سەرۆكی دەستەی دەستپاكی هەرێمی كوردستان لە لێدوانێكدا بۆ (تۆڕی میدیایی رووداو) ئاماژە بەوە دەكات، لەچەند رۆژی داهاتوو كار و چالاكی ساڵی 2014 یان ئاشكرا دەكەن و باس لەوەش دەكات، لەناو وەزیرەكانی حكومەتی هەرێمی كوردستان، تائێستا وەزیرانی (پێشمەرگە و سامانە سرووشتییەكان) سەروەت و سامانی خۆیان ئاشكرا نەكردووە.
سەرۆكی دەستەی دەستپاكی دەڵێ: "لەگەڵ ئەو دوو وەزیر و چەند بەڕێوەبەرێكی گشتی هەن، كە تائێستا سەروەت و سامانەكەیان ئاشكرا نەكردووە، بەڵام ئەوەی بۆ ئێمە مایەی خۆشحاڵییە زیاتر 95%ی بەرپرسەكان فۆرمەكەیان گەڕاندووەتەوە‌و سامانەكەیان ئاشكراكردووە".
د.ئەحمەد ئەنوەر رەتیشیكردەوە لەكاتی بڵاوكردنەوەی كار و چالاكی 2014یان سەروەت و سامانی بەرپرسان ئاشكرابكەن، گوتی "كاتی خۆی پەرلەمان رێگەی بە ئێمە نەدا سەروەت و سامانی بەرپرسەكان ئاشكرابكەین".
سەرۆكی دەستەی دەستپاكی هەرێمی كوردستان ئاماژەی بەوەشدا بەنیازن لەمساڵدا گۆڕانكاریی لە فۆڕمی ئاشكراكردنی سەروەت و سامانی بەرپرسان بكەن، گوتیشی "هەتا لە بەرنامەماندایە فۆڕمەكە بە ئەلیكترۆنی بكەین".
یەكێك لەكارە سەرەكییەكانی دەستەی دەستپاكی هەرێمی كوردستان دابەشكردنی فۆڕمی ئاشكراكردنی سەروەت سامانە بەسەر زۆر لە بەرپرسانی هەرێمی كوردستان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ