بوومەلەرزەیەک لە ئەرزەڕۆمی باکووری کوردستان روویدا

 

سەرۆکایەتیی کارەساتی لەناکاو و فریاگوزاریی تورکیا (ئافاد) بڵاویکردەوە، کاژێر 04:30 خولەکی بەرەبەیانی ئەمڕۆ چوارشەممە، 08-01-2025، بوومەلەرزەیەک بە گوڕی 4.5 پلەی رێختەر لە پارێزگای ئەرزەڕۆم روویداوە و شارۆچکەی حەسەن کەلەهـ چەقی بوومەلەرزەکە بووە.

 

بەگوێرەی ئافاد، بوومەلەرزەکە لە قووڵایی 14.81 کیلۆمەتر بووە و لە هەمان ناوچە سێ پاشلەرزەش تۆمارکراون. 

 

بوومەلەرزەکە لە پارێزگاکانی دەوروبەر هەستی پێکراوە، بەڵام تاوەکو ئێستا هیچ زانیارییەک لەبارەی زیانەکانی بڵاونەکراوەتەوە. 

 

لە 6ـی شوباتی 2023 دوو بوومەلەرزە بە گوڕەکانی 7.7 و 7.6 پلەی رێختەر لە پارێزگای مەرەشی باکووری کوردستان روویاندا. بوومەلەرزەکان 10 پارێزگای تورکیا و باکووری کوردستانیان هەژاند.

 

بەگوێرەی ئامارە فەرمییەکان، 53 هەزار و 500 کەس لە باکووری کوردستان و تورکیا لە ئەنجامی ئەو بوومەلەرزانە گیانیان لەدەستدا و 107 هەزار 204 کەسی دیکە برینداربوون.

 

بوومەلەرزەکان زیانی گەورەیان بە بەشێکی رۆژئاوای کوردستان و سووریاش گەیاند، بەتایبەتی هەرێمی عەفرینی رۆژئاوای کوردستان.