بەرگریی شارستانی: تیمی ژێرئاو، پیادە و سەگی راهێندراو بەدوای تەرمی دانەردا دەگەڕێن

 

سەرکەوت کاڕەش، گوتەبێژی بەرگریی شارستانیی هەولێر، رۆژی شەممە 8-1-2022 بە تۆڕی میدیایی رووداوی راگەیاند: "گەڕان بۆ دۆزینەوەی تەرمی دانەر بێ وەستان بەردەوامە. رۆژانی پێنجشەممە و هەیینیش بە درێژایی ئاوی گوێڕ گەڕاین؛ لە گامێشتەپە و شەمشولەش گەڕاین".

 

وەک سەرکەوت کاڕەش ئاماژەی بۆ دەکات، تیمی کەی 9ی زێرەڤانی سەگی راهێنراویان لەگەڵدایە و لەو شوێنانەی کە قامیشەڵان و زەلکاون و شوێنی سەختن، لە گەڕان بەدوای تەرمەکەدا بەردەوامن.

 

گوتەبێژی بەرگریی شارستانیی هەولێر گوتی: "هەر کەسێک زانیارییمان پێبدات راستەوخۆ دەچین؛ موختاری گوندەکان، بنکەکانی ئاسایش، پۆلیس و هاونیشتمانییانی سنوورەکەمان ئاگادار کردووەتەوە لە بوونی هەر تەرمێک یان سەرەداوێک ئاگادارمان بکەنەوە".

 

سەبارەت بە هۆکاری نەدۆزرانەوەی تەرمی دانەر تاوەکو ئێستا، سەرکەوت کاڕەش گوتی: "لەنێو پاشماوەی کارەساتی لافاودا دۆزینەوەی تەرم ئاسان نییە؛ کەندەکان تێکچوون؛ قوڕ و لیتەی زۆر کۆبووەتەوە؛ ئێمە سێجار چووبووینە ئەو شوێنەی تەرمی ئومێد شامیلی لێ دۆزرایەوە، بەڵام هاونیشتمانییان لەو شوێنەدا و لەکاتی گەڕان بە دوای شتی دیکەدا تەرمەکەیان بینی و ئێمەیان ئاگادارکردەوە".

 

بەرگریی شارستانیی هەولێر بە سێ شێوە بۆ دۆزینەوەی تەرمی دانەر نەبەزی تەمەن 10 مانگ دەگەڕێن: گەڕان بە پیادە لە دەشتاییەکان و ئەو شوێنانەی قوڕ و لیتەی لێ کۆبووەتەوە؛ گەڕان لە نێو چەم و رووبارەکان لە رێگەی تیمی ژێرئاو؛ گەڕان لەنێو قامیشەڵان و زەلکاوەکان لە رێگەی تیمی کەی9ی سریەی ئەندازیاریی سەر بە وەزارەتی پێشمەرگە کە سەگی راهێنراویان لەگەڵدایە.

 

لە لافاوەکەی رۆژی 17-12-2021ی هەولێر 12 کەس گیانیان لەدەستدا، 11 تەرم دۆزرانەوە؛ تاوەکو ئێستا تەرمی دانەر نەبەزی تەمەن 10 مانگ نەدۆزراوەتەوە.