نموونەی DNA لە کەسوکاری کۆچبەرە بێسەروشوێنبووەکان وەردەگیرێت

 

رۆژی 21-12-2021 لە ئەنجامی نقوومبوونی بەلەمێکی کۆچبەران لە دەریای ئیجە، 25 هاونیشتمانی خەڵکی هەرێمی کوردستان، بێسەروشوێنبوون، بەمەبەستی بەدواداچوون و دیاریکردنی چارەنووسی بێسەروشوێنبووان، دەزگای لووتکە نموونەی DNAی کەسوکاریان وەردەگرێت.

 

دەزگای لووتکە بۆ کاروباری پەنابەران، رۆژی شەممە 8-1-2022 لە کۆنگرەیەکی رۆژنامەڤانیدا رایگەیاند، دوای وەرگرتنی سامپڵی کەسوکاری بێسەروشوێنبووان، کەیسەکانیان رەوانەی فەرمانگەی پەیوەندییەکانی دەرەوەی حکومەتی هەرێمی کوردستان، وەزارەتی دەرەوەی عێراق و وەزارەتی دەرەوەی یۆنان دەکرێت.

 

ئاری جەلال، سەرۆکی دەزگای لووتکە رایگەیاند: "لە دوو رووداوەکەی کۆتایی ساڵی رابردوو چەندین قوربانی هەن، لە رووداوەکەی 23-12-2021 نۆ تەرم هەن و لە رێگەی فەرمانگەی پەیوەندییەکانی دەرەوەی حکومەتی هەرێمی کوردستان دەگەڕێندرێنەوە هەرێمی کوردستان".

 

نوێنەری سەرۆکی پەرلەمانی کوردستان، لە کۆنگرە رۆژنامەڤانیەکەدا گوتی: "دوای رووداوی نقوومبوونی بەلەمێک و بێسەروشوێنبوونیان لە کۆتاییەکانی ساڵی رابردوو، کەسوکاری قوربانییەکان سەردانی د. رێواز فایەقیان کرد. سەرۆکی پەرلەمان لیژنەیەکی راسپارد سەردانی خاچی سووری نێودەوڵەتیی و دەزگای لووتکە بکرێت بۆ وەرگرتنی نموونەی DNA لە کەسوکاری بێسەروشوێنبووان".

 

سەنتەری مایکرۆجین دەڵێت، هەر تەرمێک کە لە یۆنان دەدۆزرێتەوە، تەنیا ماوەی دوو هەفتە کات هەیە بۆ بردنەوەی یان لێکۆڵینەوە و پشکنین، دوای ئەو ماوەیە تەرمەکە دەنێژرێت، ئەگەر بەخاک بسپێردرێت ئەوا تاوەکو ماوەی دوو ساڵ ناتوانرێت دەربهێنرێتەوە. "بۆیە دەبێت وەرگرتنی نموونەکان خێرابکرێت و بنێردرێن بەر لەوەی بەخاکبسپێردرێن".