سکرتێری گشتیی حیزبی بێت نەهرەین: لەم کۆنگرەدا داوای ئۆتۆنۆمی دەکەین

 

 

پێنجشەممە، 07-12-2023، حیزبی دیموکراتی بێت نەهرەین، هەشتەمین کۆنگرەی لە شاری دهۆک بەست. رۆمیۆ هەکاری، سکرتێری گشتیی حیزبی دیموکراتی بێت نەهرەین لە لێدوانێکیدا بۆ هونەر رەشید، پەیامنێری رووداو رایگەیاند، "ئێمە وەکو حیزبی دیموکراتی بێت نەهرەین، هەموو کوردستان و هەموو عێراق بە خاک و ماڵی خۆمان دەزانین، کۆنگرەی شەشەممان لە شەقڵاوە بەست، کۆنگرەی حەوتەم لە دەشتی نەینەوا و ئێستاش کە کۆنگرەی هەشتەمە لە دهۆکین". 

 

رۆمیۆ هەکاری، باسی کۆچی کریستیانەکانی عێراق و هەرێمی کوردستانی کرد و گوتی، کۆچی کریستیانەکانی عێراق بۆ دەرەوە بەردەوامە، بەڵام وەکو پێشوو نییە، "دەبێ سەرەتا هۆکاری کۆچی خەڵکەکەمان بزانین، تێبگەین لەوەی کە بۆچی وڵاتی خۆیان بەجێدێڵن؟ بە دڵنیایی ئێمە وەکو حیزبی دیموکراتی بێت نەهرەین پێمان وایە، هەر لە دامەزراندنی دەوڵەتی عێراقەوە لە ساڵی 1921، ئەم وڵاتە ئەمن و ئاسایشی بەخۆیەوە نەبینیوە، گەلی ئێمە ئاشتیخواز و مرۆڤدۆستە، ئەگەر ئاشتی لە هەر شوێنێک نەبێت، رەنگە خەڵکی ئێمە بیر لە شتی باشتر و شوێنی گونجاو بکاتەوە بۆ ئەوەی لێی بژی، بەڵام ئێمە وەکو حیزبی دیموکراتی بێت نەهرەین و حیزبە سیاسییەکانی گەلەکەمان پێمانوایە مەسەلەی کوچ و جێهێشتنی وڵات، گەورەترین نەخۆشی و مەترسییە بۆ داهاتووی ئێمە، بۆیە هەندێک لە خاڵ و راسپاردەکانی کۆنگرەی حیزبی دیموکراتی بێت نەهرەین ئەوەیە کە چی بکەین خەڵکی ئێمە وڵات جێنەهڵن".

 

 

لەبارەی ژمارەی کریستیانەکانی عێراق و هەرێمی کوردستان، سکرتێری گشتیی حیزبی دیموکراتی بێت نەهرەین ئاماژەی بەوەکرد، "لە هەشتاکانی سەتەی رابردوو، نزیکەی 2 ملیۆن کریستیان لە عێراق و هەرێمی کوردستان دەژیان، بەڵام پێموایە ئێستا لەسەر ئاستی هەموو عێراق 600-700 هەزار کەسین".

 

 

پەیامنێری رووداو، لەبارەی مافی کریستیانەکانەوە پرسیاری لە سکرتێری گشتیی حیزبی دیموکراتی بێت نەهرەین کرد و لە وەڵامدا گوتی "بە دڵنیایی کەموكوڕی لە مافی کریستیانەکاندا هەیە، حیزبی دیموکراتی بێت نەهرەین لەم کۆنگرەیەدا داوای مافی ئۆتۆنۆمی دەکات، ئەمە مافێکە تاوەکو ئێستا نەدراوە، هەموو ئەمانە مانای ئەوەن کە مافی گەلانی ئێمە بەرجەستە نەکراوە". 

 

لەبارەی کێشەی زەویوزاری کریستیانەکانیش لە باشووری کوردستان گوتی "کێشەی دەستبەسەرداگرتنی زەوی و زاری کریستیانەکان کۆنە و لە شەستەکانی سەتەی رابردووەوەیە، واتە سەرەتای دەستپێکردنی شۆڕشی مەزنی ئەیلوول، لەبەر راگواستنی گوندە ئاشوورییەکان بەتایبەتی لە بادینان و ئەو ناوچانەی خەڵکی ئێمە (کریستیان) زۆرینە بوون، لە سەرووی دهۆکەوە تاوەکو دەگاتە سنووری تورکیا و ئێران، هەموو ئەو ناوچانە لەبەر دۆخی ئەمنی و شەڕ چۆڵکران، بەداخەوە ئەو دەوڵەتەی ئێمە تێیدا دەژین و پێی دەڵێین عێراق، هەر لە دامەزراندنییەوە بە شەڕ تەمەنی خەڵکی خۆی بەڕێکردووە، ئەمەش وایکردووە کە هەر لە سەرەتای شۆڕشی ئەیلوولەوە، حکومەتی بەعس خەڵکی ئێمە رابگوازێت بۆ کۆمەڵگە زۆرەملێیەکان، هەندێکیشیان بەیەکجاری شوێنەکانیان بەجێهێشت بۆ شارە گەورەکانی وەکو دهۆک، موسڵ، کەرکووک و بەغدا".

 

 

لە رۆژئاوای کوردستانیش، ژمارەیەکی زۆر کریستیان هەن. رۆمیۆن هەکاری دەڵێت، "بەشێکی زۆری حیزب و لایەنە سیاسییەکانی کریستیان بەشدارن لە ئیدارەی دەوڵەتی سووریا (رۆژئاوای کوردستانیش)، بەڵام بە دڵنیایی هەندێکیشیان رەخنەیان هەیە لەم ئیدارەیە، خوێندن بە زمانی دایک لەوێ هەیە، بەڵام بەمشێوەی ئێستا نییە لە هەرێمی کوردستان کە پەرەی سەندووە و بەرەوپێش چووە، بۆیە ئێمە گۆڕەپانی سیاسیی عێراق و سووریا و هەموو ئەو شوێنانەی کە خەڵکی ئێمەی لێیە، وەکو حیزبی دیموکراتی بێت نەهرەین بە گۆڕەپانی سیاسیی خۆمانی دەزانین، کاری سیاسی و حیزبیمان تەنیا لە عێراق و هەرێمی کوردستان قەتیس نەکردووە، لە هەموو دونیا کاری سیاسی دەکەین، بۆیە پێمانوایە هەموو ئەو برایان لە ئیدارەی زاتی (رێڤەبەری خۆسەر) لە رۆژئاوای کوردستان، زیاتر گرنگی و پەرە بە خوێندنی زمانی سریانی بدەن".