ونچ سۆیەر، سەرۆکی گەورەشارەوانیی ئیزمیر
رووداو دیجیتاڵ
سەرۆکی گەورەشارەوانیی ئیزمیر، بەخێرهاتنی پەیامنێری تۆڕی میدیایی رووداو دەکات لە پێشانگەی گەشتوگوزاری ئیزمیر و پێی دەڵێت، "خۆشحاڵم لێرە دەتانبینم، خۆشحاڵم لێرە بەشداریتان کردووە و هاتنتان سەرفرازی کردین."
ئەمڕۆ پێنجشەممە، 7ـی کانوونی یەکەمی 2023، لە ئیزمیر 17ـەمین پێشانگەی گەشتوگوزاری نێودەوڵەتیی بەڕێوەچوو. ماشەڵڵا دەکاک، پەیامنێری تۆڕی میدیایی رووداو، بەشداری لە پێشانگەکە کرد. لە کاتی سەردانی تونچ سۆیەر، سەرۆکی گەورەشارەوانیی ئیزمیر، بۆ ستاندی ئامەد، تەوقەیەکی گەرمی لەگەڵ ماشەڵڵا دەکاک کرد و دوای بەخێرهاتن گفتوگۆیەکیان کرد.
تونچ سۆیەر، بە تۆڕی میدیایی رووداو راگەیاند، ئیزمیر و دیاربەکر (ئامەد) پەیوەندییەکی زۆر بەهێزی کولتووری و کۆمەڵایەتییان هەیە و گوتی، "زۆر بە روونی دەیڵێم؛ ئیزمیر، دیاربەکری رۆژئاوایە و دیاربەکریش، ئیزمیری رۆژهەڵاتە."
سەرۆکی گەورەشارەوانیی ئیزمیر، دواتر لەگەڵ سەرۆک و ئەندامانی ژووری بازرگانیی و پیشەسازیی و کۆمەڵەی گەشتوگوزاری ئامەد کۆبووەوە.
دەقی گفتوگۆی رووداو لەگەڵ تونچ سۆیەر:
رووداو: سڵاو جەنابی سەرۆک
تونچ: سڵاو، بەخێربێن، بە ئامادەبوونتان دڵخۆشتان کردین
رووداو: سەردانی ستاندی دیاربەکرتان کرد، چیتان بۆ دیاربەکر هەیە؟
تونچ: جۆش و خرۆشییەکی زۆر دایگرتووم، هەست دەکەم لە دیاربەکرم. زۆر دڵخۆشم، خۆشحاڵم لێرە دەتانبینم، خۆشحاڵم لێرە بەشداریتان کردووە، زۆر خۆشحاڵیشم بەوەی پێکەوەین. بەخێربێن، هاتنتان ئێمەی سەرفراز کرد، ئاوەدانتان کرد. هیوادارم ئەم پێشانگەیە ببێتە مایەی خێر و بەرەکەت. ئیشاڵڵا نوخشە بێت لە دیاربەکر.
رووداو: چۆن دەتوانن رایەڵی پەیوەندی لە نێوان ئیزمیر و دیاربەکر دروست بکەن؟
تونچ: بە روونی دەیڵێم، ئیزمیر، دیاربەکری رۆژئاوایە و دیاربەکریش، ئیزمیری رۆژهەڵاتە. هەر لەسەر ئەم بنەمایە، ئیزمیر و دیاربەکر پەیوەندیی زۆر بەهێزیان هەیە بەتایبەتی لە رووی کولتووری و کۆمەڵایەتیی. ئێمەش بەردەوام دەبین لە پاراستنی ئەم پەیوەندییە بەهێزە.
رووداو: سوپاس
تونچ: من سوپاستان دەکەم
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ