رووداو دیجیتاڵ
لە دوو رووداوی هاتووچۆدا لە پارێزگای ورمێی رۆژهەڵاتی کوردستان، شەش کەس گیانیان لەدەستدا و چوار کەسیش بریندار بوون.
یەکێک لە رووداوەکان لەسەر رێگەی تیکاب - فەیزئاوا و رووداوەکەی دیکەش لەسەر رێگەی مهاباد - ورمێ روویداوە.
حەمید مەحبووبی، بەڕێوەبەری مانگی سووری پارێزگای ورمێ بە میدیای فەرمیی ئێرانی راگەیاند، ئێوارەی رۆژی چوارشەممە 6ی ئەیلوول لە 10 کیلۆمەتری رێگەی تیکاب - فەیزئاوا لە باشووری ئەو پارێزگایە سێ ئۆتۆمبێلی تایبەت پێکیانداداوە و بەو هۆیەوە پێنج کەس گیانیان لەدەستداوە و دوو کەسیش بریندار بوون.
حەمید مەحبووبی گوتی، دوای ئاگادارکردنەوەیان لە رووداوەکە، دەستبەجێ تیمەکانی فریاکەوتنیان ناردووەتە شوێنەکە و تەرمەکان و بریندارانی رووداوەکەیان گواستوونەتەوە نەخۆشخانە.
بەڕێوەبەری مانگی سووری پارێزگای ورمێ هەروەها دەڵێت، لە رووداوێکی دیکەدا لەسەر رێگەی مهاباد - ورمێ، بارهەڵگرێک خۆی بە ئۆتۆمبێلێکی تایبەت لە جۆری پیژۆ 405دا کێشا و بەو هۆیەوە کەسێک گیانی لەدەستدا و دوو کەسیش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ