رووداو دیجیتاڵ
دووکەڵ دانیشتووانی گوندی باغەمرەی شەهابی سەر بە ناحیەی دارەتووی بێزار کردووە، موختاری گوندەکە دەڵێت، "هەموو ئێوارەیەک زیاتر لە 20 تایەی ئۆتۆمبێل دەهێنن و لە گوندەکە دەیسووتێنن." پارێزگاری هەولێریش دەڵێت، "چاودێریی ئەو بابەتەمان کردووە و بە دڵنیاییەوە ئەو دوو کەسە دەستگیر دەکەین."
رۆژی شەممە 06-08-2022 جەمال جەواد، موختاری گوندی باغەمرەی شەهاب کە سەر بە ناحیەی دارەتووە، بە رووداوی راگەیاند، "دوو کەسی ئەو گوندە ئێواران نزیکەی 20 بۆ 30 تایە دەهێنن و لە گوندەکە دەیسووتێنن، ئەوەش بێزاری کردووین و ژینگەی تێکداوین."
موختاری گوندەکە گوتیشی، "ئەو کێشەیە ماوەی چوار بۆ پێنج ساڵە بەردەوامە و لەگەڵ لایەنی پەیوەندیداری وەکو، دەستەی ژینگە، پۆلیسی هەولێر و بەڕێوەبەری پێشووی ناحیەکە قسەم کردووە، بەڵام تائێستا هیچ نەکراوە و ئەو دوو کەسە دەستیان دەچێت و کە دێن تایە دەسووتێنن چەکداریان لەگەڵدایە."
ئومێد خۆشناو، پارێزگاری هەولێر بە تۆڕی میدیایی رووداوی راگەیاند، "چاودێرییەکی زۆر کراون، بەڵام تائێستا دەستگیر نەکراون و بە دڵنیاییەوە دەستگیر دەکرێن."
کاروان عارف، بەڕێوەبەری ناحیەی دارەتوو لەبارەی سووتانی تایە لە گوندی باغەمرەی شەهاب بە رووداوی گوت، "تاوەکو ئەمڕۆ ئاگادار نەکراومەتەوە لە کێشەکە، بە دڵنیاییەوە چاودێریی دەکەم و پۆلیس و ئاسایشم ئاگادار کردووەتەوە و چاودێریی دەکەین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ