رووداو دیجیتاڵ
بەهۆی وەرگەڕانییەوە تانکەرێکی سووتەمەنی لە قەزای دەربەندیخان گڕی گرت و بە گوتەی قایمقامی قەزاکە جگە لە برینداربوونی دوو کەس، زیانێکی زۆری دارایی گەیاندووە و هێشتا ئاگرەکە کۆنتڕۆڵ نەکراوە.
رووداوەکە پێشنیوەڕۆی رۆژی هەینی، 07-06-2024 روویدا. سڵێمان محەممەد، قایمقامی قەزای دەربەندیخان لە پارێزگای سلێمانی بە تۆڕی میدیایی رووداوی گوت: "تانکەرێکی سووتەمەنی کە نەفتای بارکردووە لە سلێمانییەوە هاتووە بۆ نێو دەربەندیخان، دوای دەربازکردنی تونێلی شارەکە لەنێو دەربەندیخان وەرگەڕا و بەهۆیەوە بارەکەی رژایە سەر شەقامەکە و ئاگری گرت."
سەبارەت بە زیانەکان قایمقامی قەزای دەربەندیخان گوتی: "بەهۆی رووداوەکە شۆفێری تانکەرەکە و کەسێکی دیکەی سەرنشین برینداربوون و لە نەخۆشخانەن." گوتیشی: "بەهۆی سووتانی تانکەرەکەوە زیانێکی زۆری دارایی بە ماڵەکان و ژینگە کەوتووە."
وەک قایمقامی دەربەندیخان باسی دەکات، تیمەکانی بەرگریی شارستانی گەیشتوونەتە شوێنی رووداوەکە، بەڵام هێشتا ئاگرەکە کۆنتڕۆڵ نەکراوە.
دەربەندیخان یەکێکە لە قەزاکانی پارێزگای سلێمانی و رێگەیەکی سەرەکیی بەستنەوەی پارێزگاکانی هەرێمی کوردستان بە عێراقەوەیە، زۆر جار لەنێو تونێلەکەیدا رووداوی هاتووچۆ و روودەدات. بەهۆی رووداوەکانەوە چەند جارێک تونێلەکە نۆژەنکراوەتەوە.
بەڤیدیۆ: تانکەرێکی سووتەمەنی لە دەربەندیخان گڕی گرتووە و دووکەڵێکی رەشی زۆری بەسەر شارەکەدا بڵاوکردووەتەوە
— Rudaw (@Rudawkurdish) June 7, 2024
سلێمان محەممەد، قایمقامی دەربەندیخان بە رووداوی گوت، تانکەرێک سووتاوە و هێشتا زیانەکانی دیار نین. pic.twitter.com/sSunTFeUaY
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ