حکومەت بۆ فراکسیۆنە کوردستانییەکان: بەرگری لە شایستە داراییەکانی هەرێمی کوردستان لە بودجەدا بکەن

 

داواکارییەکەی ئەنجوومەنی وەزیران لە فراکسیۆنە کوردستانییەکانی ئەنجوومەنی نوێنەرانی عێراق لەکاتێکدایە، بڕیارە سبەی (پێنجشەممە، 8-6-2023) ئەنجوومەنی نوێنەران کۆببێتەوە بۆ دەنگدان لەسەر پرۆژەیاسای بودجەی گشتیی عێراق، پرۆژەیاسایەک کە بۆ سێ ساڵە و قەبارەکەی ساڵانە زیاتر لە 199 تریلیۆن دینارە، لەو بڕەش زیاتر لە 16 تریلیۆن دینارى پشکى هەرێمی کوردستانە.

 

کورد، کێشەی لەسەر گۆڕانکارییەکانی مادەی 13 و 14ـی پڕۆژەیاسای بودجە هەبوو، کە تایبەتن بە پشکی ھەرێمی کوردستان، ئەگەرچی دەڵێن رێککەوتن کراوە، بەڵام نایشارنەوە ئەگەر لە بەرژەوەندیی ھەرێمی کوردستان نەبێت، ئامادە نین دەنگ بە پڕۆژەیاساکە بدەن.

 

 

مستەفا گۆران، پەیامنێری رووداو لە بەغدا دەڵێت، "لە ماڵی هادی عامری، سەرۆکی هاوپەیمانیی فەتح لە شاری بەغدا بە ئامادەبوونی سەرکردەکانی هاوپەیمانیی بەڕێوەبردنی دەوڵەت کۆبوونەوە کرا. لە پارتی دیموکراتی کوردستان هەریەک لە فوئاد حوسێن، بەنگین رێکانی و شاخەوان عەبدوڵڵا بەشداربوون و رێککەوتن لەسەر ئەوەی؛ سبەی هەموو لایەنەکان بەشداری کۆبوونەوەکە بکەن و دەنگ بە پڕۆژەیاسای بودجە بدەن".