رووداو دیجیتاڵ
بەڕێوەبەرایەتیی گشتیی کەشناسیی تورکیا هۆشداری دروستبوونی لافاو لە ژمارەیەک پارێزگای باکووری کوردستان دەدات؛ دەشڵێت، لێزمەباران ماوەی دوو رۆژ بەردەوام دەبێت.
بەڕێوەبەرایەتییەکە لە ماڵپەری فەرمیی خۆیدا پێشبینییەکانی کەشوهەوای ئەمڕۆ یەکشەممە، 7ـی نیسانی 2024ـی لە تورکیا و باکووری کوردستان بڵاوکردەوە، تێیدا هۆشداری لە دروستبوونی لافاو دەدات.
کەشناسیی تورکیا دەڵێت، لە نیوەڕۆی ئەمڕۆوە لە پارێزگاکانی وان، جۆلەمێرگ، شرنەخ، مێردین، رووها، دیلۆک، سەمسوور، ئامەد، ئێلیهـ و سێرتی باکووری کوردستان، شەپۆلی بەهێزی بارانبارین دەستپێدەکات.
هەروەها لە پارێزگاکانی ئەردەخان، قەرس، ئیدر، ئاگری، ئەرزەڕۆم، ئەرزینگان، دێرسم، مەلەتێ، خارپێت، چەولیگ، مووش، مەرەش و بەدلیسی باکووری کوردستان، تەرزە دەبارێت.
کەشناسیی تورکیا هۆشداریی دروستبوونی لافاو لە مێردین، شرنەخ، سێرت، ئامەد، ئێلیهـ و رووها دەدات؛ پێشبینیش دەکات، پلەی گەرما لەو ناوچانە دابەزێت و بارانبارینەکەش تاوەکو 9ـی مانگ بەردەوام بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ