رووداو دیجیتاڵ
بڕیارە ئەمڕۆ هەینی لەشاری هەولێر دەستەی نوێنەرانی مامۆستایانی وانەبێژ لە هەرێمی کوردستان لەگەڵ چەند بەرپرسێکی وەزارەتی پەروەردەی عێراق کۆببنەوە بەمەبەستی دامەزراندنیان. نوێنەری مامۆستایانی وانەبێژ دەڵێت: "دەمانەوێت لە دامەزراندنی وانەبێژاندا پشکی پارێزگاکانی هەرێمی کوردستانیش هەبێت."
رۆژی هەینی 7-4-2023، عەلی رەئوف، نوێنەری گشتیی مامۆستایانی وانەبێژ لە هەرێمی کوردستان بە تۆڕی میدیایی رووداوی راگەیاند: "بڕیارە ئەمڕۆ لەگەڵ چەند بەرپرسێکی وەزارەتی پەروەردەی عێراق کۆببینەوە و کێشەکانی مامۆستایانی وانەبێژی هەرێمی کوردستانیان پێڕابگەیێنین لەوانەش دانەمەزراندن، ئێمە دەمانەوێت هاوشێوەی پارێزگاکانی دیکەی عێراق، لە دامەزراندا پشکی پارێزگاکانی هەرێمی کوردستانیش هەبێت و مامۆستایانی وانەبێژ لەنێو رەشنووسی بودجەی ئەمساڵدا شوێنیان بۆ بکرێتەوە."
نوێنەری گشتیی مامۆستایانی وانەبێژ لە هەرێمی کوردستان پێیوایە، رێککەوتنی نێوان هەولێر و بەغدا دەرفەتێکی "باشە" بۆ ئەوەی داوا بکەن وەکو پارێزگاکانی دیکە، ئەوانیش دابمەزرێندرێن.
بەپێی ئامارەکان، لە هەرێمی کوردستان 34 هەزار و 359 مامۆستای وانەبێژ هەن، کە 11 هەزار و 412 وانەبێژ لە سنووری پارێزگای هەولێرن، 13 هەزار و 386 وانەبێژ لە سنووری پارێزگای دهۆک و 9 هەزار و 561 وانەبێژیشیان لە سنووری پارێزگای سلێمانین.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ