لە شەڕی دوو خێزاندا لە دیلۆک دوو کەس کوژران

 

رووداوەکە درەنگی شەوی پێنجشەمە 6ی نیسانی 2023 لە گەڕەکی "گونەش"ی سەر بە شارۆچکەی "شاهینبەی"ی لە ناوەندی شاری دیلۆک روویدا.

 

بەگوێرەی زانیارییەکان، بەهۆکارێکی نادیار دەمەقاڵی لە نێوان ئەو دوو خێزانەدا روویداوە و دواتر بووەتە شەڕیان و تەقەیان لە یەکدی کردووە.

 

دوای گەیشتنی تیمەکانی فریاکەوتن و پۆلیس، چوار کەس کە لە شەڕەکەدا بریندار بوون، گوازرانەوە بۆ نەخۆشخانە.

 

هەریەک لە "محەممەد عەلی کوش"ـی تەمەن 35 ساڵ و "عەلی چەکیچ"ـی تەمەن 22 ساڵ لە نەخۆشخانە گیانیان لەدەستدا، "سانیە د."ـی تەمەن 45 ساڵ و "حوسێن چ"ـی تەمەن 44 ساڵ لە نەخۆشخانە خەوێندراون.

 

بۆ رێگری لە سەرهەڵدانەوەی شەڕەکە، هێزە ئەمنییەکان لە گەڕەکەکەدا رێوشوێنی ئەمنییان گرتەبەر و لێکۆڵینەوە لە رووداوەکە دەستیپێکردووە. 

 

محەممەد عەلی کوش، فەرمانبەری پۆلیس بووە لە بەڕێوەبەرایەتیی پۆلیسی شارۆچکەی "شاهینبەی" و لە کاتی رووداوەکەدا لە مۆڵەتدا بووە.