سکرتێری بەرەی یەکگرتووی کورد ئازادکرا

 

سیاوەش حەیاتی، سکرتێری بەرەی یەکگرتووی کورد، پێشتر لەلایەن دادگەی شاری ئیسلامئاوا لە پارێزگای کرماشانی رۆژهەڵاتی کوردستان سزای یەک ساڵ بەندکردنی بەسەردا سەپێندرابوو، دوای تەواوکردنی ماوەی سزاکەی لە زیندانی دیزڵئاوای کرماشان، دوێنێ (چوارشەممە، 06-03-2024) ئازادکرا.

 

دادگەی شۆڕشی شاری ئیسلامئاوا رۆژی 22-11-2022 بڕیاری لەسەر دۆسێی سیاوەش حەیاتی دابوو کە بە یەک ساڵ بەندکردن سزای دا.

 

ئەوکات بەرەی یەکگرتووی کورد لە راگەیێندراوێکدا گوتی، سیاوەش حەیاتی بەهۆی خوێندنەوەی گوتارێک لە رێوڕەسمی بەخاکسپاردنی مینو مەجیدی، لە قوربانییانی خۆپێشاندانەکانی ساڵی 2022 لە کرماشان، سزا دراوە.

 

مانگی ئەیلوولی ساڵی 2022، حەیاتی لە رێوڕەسمی بەخاکسپاردنی ئەو هاونیشتمانییەدا لە گۆڕستانی کرماشان، رەخنەی لە کوشتنی خۆپێشاندەران گرت و گوتی: ''دەسەڵاتی ئێران کەوتووەتە دەست کەمینەیەک کە بۆ پاراستنی خۆیان دەست بۆ هەموو شتێک دەبەن و کۆمەڵێک کەسیان بەرداوەتە گیانی خەڵک و خوێنیان دەڕێژن بۆ ئەوەی دەنگیان بەرزنەکەنەوە.''

 

دوای رێوڕەسمەکە، سیاوەش حەیاتی دوو جار لە لایەن هێزە ئەمنییەکانەوە دەستبەسەرکرا و هەردوو جاریش بە کەفالەت ئازاد کرا. دواتر لقی پێنجی دادگەی شۆڕشی کرماشان لە شاری ئیسلامئاوای پارێزگاکە، بە تۆمەتی ''پڕوپاگەندە دژی نیزام'' ئەو سزایەی بۆ سکرتێری بەرەی یەکگرتووی کورد دەرکرد.

 

بەرەی یەکگرتووی کورد تاکە رێکخراوی سیاسیی ئاشکرایە، کە لە نێوخۆی رۆژهەڵاتی کوردستان چالاکی دەکات. ئەو بەرەیە لە ساڵی 2005 دامەزراوە، بەڵام تاوەکو ئێستا بە فەرمی مۆڵەتی کارکردنی پێنەدراوە.