رووداو - هەولێر
بڕیارە رۆژی چوارشەممە پارتی و یەکێتی لەسەر ئاستی دەزگای هەڵبژاردن لە شاری هەولێر کۆببنەوە. سەرۆکی فراکسیۆنی یەکێتی لە پەرلەمانی کوردستان دەڵێت: " کۆبوونەوەکە لەبارەی هەموارکردنەوەی یاسای هەڵبژاردنە."
رۆژی سێشەممە 07-03-2023، زیاد جەبار، سەرۆکی فراکسیۆنی یەکێتی لە پەرلەمانی کوردستان بە تۆڕی میدیایی رووداوی گوت: "سبەی دەزگای هەڵبژاردنی یەکێتی و پارتی لە بارەگای مەکتەبی سیاسی یەکێتی لە هەولێر کۆدەبنەوە."
لەبارەی نێوەڕۆکی کۆبوونەوکە، زیاد جەبار گوتی: "لەبارەی هەموارکردنەوەی یاسای هەڵبژاردنە بە هەموو وردەکارییەکانییەوە."
رۆژی 28-02-2023، لەسەر ئاستی دەزگای هەڵبژاردن یەکێتی و پارتی لەبارەی هەمواری یاسای هەڵبژاردن و بەتایبەتی شێوازی بەشداریکردنی پێکهاتەکان کۆبوونەوە، دوای کۆبوونەوەکە زانا مەلا خالید، سەرۆکی فراکسیۆنی پارتی و لوقمان وەردی، جێگری سەرۆکی فراکسیۆنی یەکێتی لە پەرلەمانی کوردستان کە لە کۆبوونەوەکەدا بەشداربوون، لە کۆنگرەیەکی رۆژنامەڤانیدا وردەکاریی کۆبوونەوەکەیان خستەڕوو.
زانا مەلا خالید گوتی: "لە ماوەی رابردوودا لەسەر بابەتی بازنەکانی هەڵبژاردن و کاراکردنەوەی کۆمیسیۆنی هەڵبژاردن و شێوازی هەڵبژاردن ناکۆکیمان هەبوو، ئەمڕۆ دوای گفتوگۆکردنی تێرو تەسەل لەسەر زۆربەی هەرە زۆری خاڵەکان رێککەوتین و لێکتێگەیشتنی هاوبەشمان دروستکردووە."
یەکێتی داوا دەکات لە 11 کورسییەکەی پێکهاتەکان چوار کورسییان بۆ پارێزگای سلێمانی بن و پارتیش دەڵێت، لەگەڵ داوای پێكهاتەکاندان. لوقمان وەردی، جێگری سەرۆکی فراکسیۆنی یەکێتیش لە کۆنگرە رۆژنامەوانییەکە گوتی: "لەسەر بابەتەکانی سیستمی چوار بازنەیی و تۆماری بایۆمەتری و داتاکانی حکومەتی عێراق بۆ دابەشکردنی کورسییەکان بەسەر بازنەکاندا رێککەوتین."
بڕیار بوو رۆژی شەممە 04-03-2023 لەسەر ئاستی دەزگای هەڵبژاردن یەکێتی و پارتی کۆببنەوە، بەڵام بەهۆی رەوشی تەندروستی رزگار حەمە، بەرپرسی دەزگای هەڵبژاردنی یەکێتی کۆبوونەوەکە بۆ رۆژی دووشەممە 6ی ئەم مانگە دواخرا و دواتر بە هەمان هۆکار جارێکی دیکە کۆبوونەوەکەیان دواخست.
![وێنەیەکی ماناییە [ناڕاستییە] و بە ژیریی دەستکرد دروستکراوە.](https://www.rudaw.net/s3/rudaw.net/ContentFiles/843992Image1.jpg?mode=crop&quality=70&rand=1&scale=both&w=362&h=226&version=7260914 "وێنەیەکی ماناییە [ناڕاستییە] و بە ژیریی دەستکرد دروستکراوە.")
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ