رووداو دیجیتاڵ
شەش ئەندامی ماڵباتێک لە ئامەدی باکووری کوردستان، بەهۆی ئاگرکەوتنەوە لە ماڵەکەیاندا بە دووکەڵ ژەهراوی بوون.
رووداوەکە بەرەبەیانی ئەمڕۆ چوارشەممە، لە گەڕەکی لالەبێی لە شارۆچکەی سووری ئامەد روویدا. ئاگرەکە لە خانوویەکی دوو نهۆمی کەوتووەتەوە کە تائێستا هۆکارەکەی نازانرێت.
شەش لە ئەندامانی خێزانەکە بە دووکەڵ ژەهراوی بوون. لەگەڵ تەشەنەسەندنی ئاگرەکە هەواڵ بە تیمەکانی ئەمبوڵانس و فریاکەوتن درا. ئەندامانی خێزانەکە گواسترانەوە بۆ نەخۆشخانە و خرانە ژێر چاودێریی پزیشک. تیمەکانی بەرگریی شارستانی ئاگرەکەیان کۆنترۆڵ کرد و رایانگەیاند، رووداوەکە زیانی گیانی لێنەکەوتووەتەوە، بەڵام زیانی بە خانووی ئەو خێزانە و دەوروبەریش گەیاندووە.
بەگوێرەی زانیارییە سەرەتاییەکانی تیمی بەرگریی شارستانی، ئەگەری ئەوە هەیە ئاگرەکە بەهۆی زۆپاوە کەوتبێتەوە. بەهۆی ئەوەی رووداوەکە لەکاتێکدا روویداوە کە ئەندامانی ماڵباتەکە لە خەودا بوون، بۆیە بە دووکەڵەکەی ژەهراوی بوون و بە گوتەی خۆیان، ئەو شەش کەسە لە دوایین خولەکەکاندا رزگاریان بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ