رووداو دیجیتاڵ
وەزارەتی شارەوانی و گەشتوگوزاری هەرێمی کوردستان دەڵێت، پار بە گوژمەی 53 ملیار دینار 131 پڕۆژەی خزمەتگوزاری لە پارێزگای دهۆک جێبەجێكراون. گوتەبێژی شارەوانیی دهۆکیش دەڵێت، دەست بە دروستکردنی دوو پارک کراوە و بە تەواوبوونیان رێژەی سەوزایی بەرزدەبێتەوە.
ئەمڕۆ سێشەممە، 07-01-2025، وەزارەتی شارەوانی و گەشتوگوزاری هەرێمی کوردستان بڵاویکردەوە: "لە ساڵی 2024ـدا لە پارێزگای دهۆک بە گوژمەی زیاتر لە 53 ملیار دینار، 131 پڕۆژەی خزمەتگوزاری جێبەجێكراون."
بە گوێرەی وەزارەتی شارەوانی و گەشتوگوزاری هەرێمی کوردستان، گوژمەکە 53 ملیار و 803 ملیۆن دینار بووە. 76 پڕۆژەیان لەسەر بودجەی تایبەت و 30 پڕۆژەیان لەسەر داهاتی بەڕێوەبەرایەتیی گشتیی شارەوانییەكانی دهۆک جێبەجێكراون؛ 18 پڕۆژە لەسەر بودجەی پەرەپێدان و 8 پڕۆژەش لەسەر بودجەی وەبەرهێنانی وەزارەتی شارەوانی و گەشتوگوزار جێبەجێكراون.
هەر ئەمڕۆ ئیسماعیل مستەفا، گوتەبێژی سەرۆکایەتیی شارەوانیی دهۆک بە رووداوی گوت: "پار دەست بە دروستکردنی دوو پارک کرا کە تاوەکو ئێستا تەواو نەبوون. ئەوانیش پارکی سەرهەڵدان و ئالۆکان. پارکی ئالۆکا دەبێتە پارکی گشتیی دهۆک کە رووبەری 660 دۆنمە. پارکی سەرهەڵدانیش 46 دۆنمە. بە تەواوبوونیان رێژەی سەوزایی دهۆک لە 14٪ـەوە دەبێتە 20٪".
وەزارەتی شارەوانی و گەشتوگوزاری هەرێمی کوردستان باس لە پڕۆژەکان دەکات و دەڵێت: "9 پڕۆژەیان لە قەزای دهۆک، 43 پڕۆژەیان لە قەزای سێمێل، 26 پڕۆژەیان لە قەزای ئامێدی، 13 پڕۆژەیان لە قەزای شێخان، 20 پڕۆژەیان لە قەزای بەردەڕەش، 20 پڕۆژەیش لە قەزای ئاكرێ جێبەجێكراون."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ