رووداو دیجیتاڵ
مەزڵوم عەبدی رایگەیاند، ئامادەن سنووری دەسەڵاتی خۆیان لە هەموو هێرشێک بپارێزن. گوتیشی، پەیوەندییان لەگەڵ تەحریر شام هەیە و هەردوو لایەن هیچ بڕیارێکیان نییە دژی یەکتر شەڕ بکەن.
فەرماندەی گشتیی هێزەکانی سووریای دیموکرات- هەسەدە ئاماژەی بەوەشکرد، لە گەڕەکە کوردییەکانی حەلەب هێزیان هەیە و لەگەڵ دەستەی تەحریر شام- هەتەشە لە پەیوەندیدان و دەیانەوێت گفتوگۆی سیاسییان هەبێت.
ئەمڕۆ هەینی 06-12-2024، لەبارەی دۆخی سووریا و مەترسییەکانی شەڕ لە رۆژئاوای کوردستان و باکووری و رۆژهەڵاتی سووریا، مەزڵوم عەبدی، فەرماندەی گشتیی هێزەکانی سووریای دیموکرات (هەسەدە) کۆنفرانسێکی رۆژنامەڤانی بەڕێوەبرد و ئاماژەی بە پەیوەندییەکان لەگەڵ دەستەی تەحریر شام- (هەتەشە) کرد.
لە سەرەتای قسەکانیدا فەرماندەی گشتیی هەسەدە باسی لە ئاوارەبوونی هاونیشتمانیان کرد و گوتی: "لەگەڵ هاوپەیمانان توانیمان بەشێکی زۆری گەلەکەمان لە تل رەفعەت و شەهبا رزگار بکەین و ئێستاش لە هەوڵداین ئەوانەی ماون بیانگەیێینینە ناوچە ئارامەکان".
"لە گەڕە کوردییەکانی حەلەب زیاتر لە 250 هەزار کورد هەن"
مەزڵوم عەبدی باسی لە هاونیشتمانیانی هەردوو گەڕەکی شێخ مەقسوود و ئەشرەفییە لە حەلەب کرد و گوتی: "لەو دوو گەڕەکە کوردییە زیاتر لە 250 هەزار کورد دەژین؛ لە ژێر مەترسی و گەمارۆدان. لەوێش هێزی نێوخۆییمان هەیە بە قارەمانانە گەلی خۆیان دەپارێزن".
فەرماندەی هەسەدە گوتی، ئەوان دەیانەوێت هەر کێشەیەک لە گەڕەکەکانی شێخ مەقسوود و ئەشرەفییە هەبێت لە رێگەی گفتوگۆوە چارەسەری بکەن، بەڵام "لە چوارچێوەیەکدا بێت کە گەلەکەمان لەوێ بمێنێتەوە و ناسنامەی کوردبوونی خۆی بپارێزێت و لە حەلەبی نوێدا جێگەی خۆی هەبێت".
"دەمانەوێت لەگەڵ تورکیا بە گفتوگۆ کێشەکانمان چارەسەر بکەین"
مەزڵوم عەبدی گوتی، تورکیا بەردەوام هەڕەشە لە ناوچەکانی باکوور و رۆژهەڵاتی سووریا بە گشتی و بەتایبەت لە منبج دەکات. گوتیشی: "ئێمە دەمانەوێت کێشەکان لەگەڵ دەوڵەتی تورکدا بە گفتوگۆ چارەسەر بکەین. بۆ هێورکردنەوەی دۆخەکەش هەوڵدانی هاوپەیمانی نێودەوڵەتی و رووسیاش هەیە".
لە بەشێکی دیکەی قسەکانی فەرماندەی گشتیی هێزەکانی سووریای دیموکرات باسی لەوە کرد، ئەوان لە چوار ساڵی رابردوودا ئامادەکارییان بۆ ئەم دۆخە کردووە. گوتیشی: "بە گەلەکەمان دەڵێین؛ هێزەکانمان ئامادەن؛ بەشی ئەوە هەن لە بەرامبەر هەموو هێرشێکدا بتانپارێزن".
بەگوتەی مەزڵوم عەبدی، بەهۆی کشانەوەی حکومەتی سووریا لە چەند ناوچەیەک بۆشایی دروست بووە. دەشڵێت: "داعش دەستیان گرتووە بەسەر چەند شوێنێکدا و رێکخستەکانیان پتەو کردووە. هێزی دیکەش هەوڵ دەدەن دەستبگرن بەسەر ئەم هەرێمانەدا، بۆیە مەترسی لەسەر گەلەکەمان دروست دەبێت. بۆئەوەی ئێمە گەلەکەمان لەم ناوچانە، لە دێرەزوور، رەققە و تەبقە بپارێزین چیمان پێ بکرێت دەیکەین".
فەرماندەی گشتیی هەسەدە ئاماژەی بەوەشکرد: "بەرامبەر زیاتربوونی مەترسییەکانی داعش و گرووپە توندڕەوەکانی دیکە، دەبێت پەیوەندی و خەباتمان لەگەڵ هاوپەیمانیی نێودەوڵەتی لە هەموو کاتێک زیاتر پتەو بکەین".
"بە گفتوگۆی سیاسیی کێشەکانی سووریا چارەسەر بکرێت"
مەزڵوم عەبدی گوتی: "گەلەکەمان لە باکوور و رۆژهەڵاتی سووریا زیاتر لە جاران دەپارێزین، بەڵام ئاشکرایە لە سووریا دۆخێکی نوێ دروستبووە، ئەمانەی روودەدەن ئەوە دەخەنەڕوو، کە پێویستی بە چارەسەریی سیاسیی هەیە، ئێمە لەگەڵ گفتوگۆی سیاسیداین بۆ چارەسەکردنی کێشەکان. هەروەها لەگەڵ پێکهێنانی بڕیاری نێودەوڵەتی 2254 داین کە تایبەتە بە سووریا".
فەرماندەی گشتیی هەسەدە باسی لە گفتوگۆکانی رابردوو بۆ چارەسەکردنی دۆخی سووریا کرد و گوتی: "لە 10 ساڵی رابردوو نوێنەری باکوور و رۆژهەڵاتی سووریا لە گفتوگۆکاندا نەبوون بۆیە سەرکەوتوو نەبوون، ئێستا ئێمە ئامادەین و پێویستە نوێنەرمان لە دانووستانداکاندا هەبێت بۆ ئەوەی چارەسەری سیاسیی لە تەواوی سووریادا پێشبکەوێت".
"ئێمە و تەحریر شام هەردوولا بڕیاری شەڕکردنمان دژی یەک نییە"
مەزڵوم عەبدی لەبارەی پەیوەندیی هەسەدە و هەتەشەوە گوتی: "لە چەند کەناڵێکەوە پەیوەندیمان لەگەڵ تەحریر شامدا هەیە، بەتایبەت لەبارەی پاراستنی خەڵکەکەمان لە حەلەب. ئێمە لەگەڵ ئەواندا شەڕمان نەکردووە و شەڕیش دروست نەبووە. ئەوەی پەیوەندی بە ئێمەوە هەیە ئەوەیە، هەرێمی ئێمە کە باکوور و رۆژهەڵاتی سووریایە نەبێتە ئامانجی هێرش. ئەگەر هێرشیش بکرێتە سەرمان ئێمە خۆمان دەپارێزین هێرشەکە لەلایەن هەر لایەنێکەوە بێت".
عەبدی گوتی: "لەگەڵ دەستەی تەحریر شام دەمانەوێت لە رێگەی گفتوگۆی سیاسییەوە کێشەکانمان چارەسەر بکەین و ئاگربەست لەنێوان هەموو لایەنەکاندا دروست بێت".
فەرماندەی هێزەکانی سووریای دیموکرات لە بەردەوامی قسەکانیدا ئاماژەی بە پەیوەندییەکانیان کرد و گوتی: "بۆ پاراستنی هەرێمەکەمان لەگەڵ هەموو لایەنەکان لە پەیوەندیداین، لەنێویاندا لەگەڵ حکومەتی عێراق، لایەنی هەرێمی و دەوڵەتەکانی دیکەش".
عەبدی دەڵێت: "راستە مەترسیی هەیە و دەوڵەتی تورک راستەوخۆ هەڕەشە دەکات و مەترسی هەیە گرووپی چەکدار بێن تاوەکو هەرێمی دێرەزوو و رەققە، بۆ پاراستنی ئەو ناوچانەش چیمان پێ بکرێت دەیکەین، بۆ ئەوەش لەگەڵ ئەمریکا، رووسیا و هاوپەیمانیی نێودەوڵەتیش هاوئاهەنگیمان هەیە و پێکەوە کاردەکەین و پەیوەندیمان پتەوە".
"نامانەوێت جارێکی دیکە لەم ناوچانە شەڕ دروستبێت و بۆ چارەسەکردنی کێشەکانیش ئێمە لە رێگەی وڵاتانەوە لەگەڵ ئەو لایەنانەدا گفتوگۆ دەکەین کە گرووپە چەکدارەکان دەجووڵێنن و ئاراستەیان دەکەن" ئەوەش بەشێکی دیکەی قسەکانی فەرماندەی گشتیی هەسەدەیە لە کۆنفرانسە رۆژنامەڤانییەکەی ئەمڕۆدا.
"لەگەڵ عێراق و ئوردن لە پەیوەندیداین"
فەرماندەی گشتیی هەسەدە ئاماژەی بە کشانەوە ئاوارەکانی عەفرین لە تل رەفعەت و شەهبا کرد و گوتی: "بە هاوکاری و پەیوەندیی ئەمریکا کرا. هەروەها هاوئاهەنگییەک لەگەڵ ئەو هێزەشدا هەبوو کە چووبوونە شوێنەکە، راستە ژمارەیەک هاونیشتمانی ماون و ئاستەنگییان بۆ دروستکراوە؛ خەڵک کوژراوە و رفێندراوە، بەڵام ئێمەش کارکردنمان بۆ گەڕانەوەی خەڵک تەواو نەبووە. هاوئاهەنگییەک هەیە و دەبێت ئەمڕۆ چارەسەر بکرێت و رێگەی دەرچوونیان پێ بدرێت، ئەگەر ئاستەنگی دروست نەکرێتەوە".
مەزڵوم عەبدی گوتی: "ئێستا بنەمای زیاتر هەن بۆ چارەسەریی سیاسیی لە سووریا. ئێستا زۆر لایەن لەگەڵ ئێمەدا لە پەیوەندیدان، لە سەرووی هەموویانەوە نوێنەری نەتەوە یەکگرتووەکان، داوا دەکەن نوێنەری ئێمەش بۆ چارەسەری و گفتوگۆ هەبێت".
فەرماندەی هەسەدە جەختی لەوە کردەوە، "هیچ" بڕیارێکیان نییە بۆ شەڕکردن لەگەڵ دەستەی تەحریر شام- هەتەشە. گوتیشی: "تەحریر شامیش بڕیاری شەڕیان دژی ئێمە نییە، بەڵام ئێمە چاوەڕێی پەیمانەکانیان دەکەین بزانین چۆن کار دەکەن. دیسانیش بۆ ئەوەی سووریا پارچە نەبێت ئێمە هەموو کارێک دەکەین و لەگەڵ وڵاتاندا لە پەیوەندیدان، لەنێویاندا لەگەڵ عێراق و ئوردن".
لە بەشی کۆتایی قسەکانیدا مەزڵوم عەبدی ئاماژەی بە کەمپی هۆل کرد کە خێزانی چەکدارانی داعش تێیدا دەستبەسەرن و گوتی: "لەسەر کەمپی هۆل مەترسی هەیە. ئەمڕۆ لە نزیک کەمپەکە چالاکی داعش هەبووە، هەڤاڵی ئێمە شەهید و برینداریان هەیە، داعش جووڵە دەکات و بوێری بۆ دروست بووە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ