لە رووداوێکی هاتووچۆدا لە مێردین چوار کەس گیانیان لەدەستدا

 

رووداوەکە ئەمڕۆ چوارشەممە، 06-11-2024، لە شارۆچکەی دارگەچیت سەر بە پارێزگای مێردینی باکووری کوردستان روویدا؛ دوای ئەوەی شۆفێرەکە کۆنترۆڵی ئۆتۆمبێلکەی لەدەستدا، وەرگەڕا.

 

تیمەکانی تەندروستی و جەندرمە گەیشتنە شوێنی رووداوەکە، بەگوێرەی زانیارییەکان چوار کەس گیانیان لەدەستداوە و چواری دیکەش برینداربوون کە یەکێکیان منداڵێکی ساوایە.

 

بریندارەکان گەیێندرانە نەخۆشخانە و تەرمی چوار کەسەکەش رەوانەی دادپزیشکیی پارێزگاکە کرا.

 

بەگوێرەی ئامارەکانی بەڕێوەبەرایەتیی گشتیی هاتووچۆی تورکیا، لە 6 مانگی سەرەتای ئەم ساڵدا 344 هەزار و 906 رووداوی هاتووچۆ لە باکووری کوردستان و تورکیا تۆمارکراون کە تێیاندا هەزار و 533 کەس گیانیان لەدەستداوە و 215 هەزار و 646 کەسی دیکەش بریندار بوون.