ئامادەکاری بۆ قۆناخێکی دیکەی سەرژمێریی دانیشتووان دەکرێت

 

کارزان رەزا، بەڕێوەبەری راگەیاندنی وەزارەتی پلاندانان و سەرۆکی لیژنەی راگەیاندنی سەرژمێری، ئەمڕۆ سێشەممە بە تۆڕی میدیایی رووداوی گوت: "ئەمڕۆ لە بەڕێوەبەرایەتییەکانی ئامار لە پارێزگا و ئیدارە سەربەخۆکانی هەرێمی کوردستان، 2 خولی راهێنانی تایبەت بە گەمارۆسازی و ژمارەدانان لە ئیدارە سەربەخۆکانی هەرێمی کوردستان دەستیپێکرد". 

 

کارزان رەزا گوتیشی: "گەمارۆسازی و ژمارەدانان لە پێداویستییەکان و قۆناخەکانی پێش سەرژمێریین. 14 هۆڵ بۆ راهێنان دیاریکراون و 659 مامۆستا بەشدار دەبن". 

 

بە گوێرەی دابەشکارییەکە، لە پارێزگای دهۆک لە 3 هۆڵ 114 مامۆستا بەشداردەبن، لە پارێزگای هەولێر لە 5 هۆڵ 226 مامۆستا، لە پارێزگای سلێمانی لە 6 هۆڵ 319 مامۆستا بەشداردەبن. دواتریش ئەو راهێنەرانە لە 188 هۆڵ لە پارێزگاکان و ئیدارە سەربەخۆکان راهێنان بە 7 هەزار و 765 مامۆستای بەشدار لە پڕۆسەکەدا دەکەن و دابەشکارییەکەش بەم جۆرە دەبێت: 

ئەو ژمارەیە و هۆڵەکانیش بەم شێوەیە دابەش دەبن:

 

- پارێزگای دهۆک

1393 مامۆستا لە 37 هۆڵ

 

- پارێزگای هەولێر:

2874 مامۆستا لە 72 هۆڵ

 

- پارێزگای سلێمانی:

3498 مامۆستا لە 77 هۆڵ

 

بەڕێوەبەری راگەیاندنی وەزارەتی پلاندانان و سەرۆکی لیژنەی راگەیاندنی سەرژمێری ئاماژەی بەوەشکرد، "پڕۆسەی گەمارۆسازی و ژمارەدانان لە کۆتایی ئەم مانگە بەشێوەیەکی مەیدانی لە سەرتاسەری هەرێمی کوردستان دەستپێدەکات کە خۆی دەبینێتەوە لە ژمارەدانان لە هەموو جۆرە شوێنێک کە پێگەی جوگرافی هەبێت، دواتر هەژمارکردنی تەوای بینا و باڵەخانەکان و پڕۆسەکەش دوو مانگی پێدەچێت". 

 

حکومەتی عێراق بڕیاریداوە 20ـی تشرینی دووەمی ئەم ساڵ سەرژمێریی گشتیی دانیشتووان بکات.

 

لە ساڵی 2009ـەوە حکومەتی عێراق بەنیازە سەرژمێری بکات، بەڵام زۆر هۆکار رێگربوون لە ئەنجامدان و بەڕێوەچوونی. 

 

بەپێی پێشبینییەکانی وەزارەتی پلاندانانی عێراق، ژمارەی دانیشتووانی عێراق لەساڵی 2030ـدا دەگاتە 51 ملیۆن و 211 هەزار و 700 کەس.