رووداو دیجیتاڵ
وەزیری بازرگانیی هەرێمی کوردستان رایگەیاند، "ئەم هەفتەیە پارەی گەنمی جووتیاران بۆ ساڵانی 2014، 2015، 2016 دەگاتە هەرێمی کوردستان و پێشبینی دەکەین دوای رێکارە کارگێڕییەکانی بانک هەفتەی داهاتوو دەست بە دابەشکردنی بکەین."
ئەمڕۆ شەممە، 6-8-2022 کەمال موسلیم، وەزیری بازرگانیی هەرێمی کوردستان بە تۆڕی میدیایی رووداوی راگەیاند: "سەرەتای ئەم هەفتەیە 100 ملیار دینار پارەی گەنمی جووتیاران هی ساڵانی 2014، 2015، 2016 بەدەستمان دەگات و دوای رێکارە کارگێڕییەکانی بانک دەست بە دابەشکردنی دەکەین."
وەزیری بازرگانی گوتیشی: "ئومێدەوارین لە ماوەی 10 رۆژی داهاتوو، 208 ملیاری دیکەش بگاتە دەستمان و تەواوی پارەکە کە 308 ملیار دینارە دابەشی بکەین."
رۆژی 8-6-2022، ئەنجوومەنی نوێنەرانی عێراق بە ئامادەبوونی 273 ئەندامی ئەنجوومەنەکە کۆبووەوە و دەنگی بە پێشنیازەیاسای پاڵپشتیی خێرای ئاسایشی خۆراک و گەشەپێدان دا.
لە چوارچێوەی پێشنیازەیاسای پاڵپشتیی خێرای ئاسایشی خۆراک و گەشەپێدان، شەش ترلیۆن دینار بۆ وەزارەتی بازرگانی دیاریکرا، کە پێنج تریلیۆن و 500 ملیار دینار بۆ بەشەخۆراک و کڕینی گەنم و برنج و 500 ملیار دینار بۆ شایستەی جووتیاران دیاری کرا.
لەو چوارچێوەیەدا 308 ملیار دینار بۆ پارەی گەنمی جووتیارانی هەرێمی کوردستان بۆ ساڵانی 2014، 2015، 2016 دیاریکرا.
پێشنیازەیاسای پاڵپشتیى خێراى ئاسایشى خۆراک و پەرەپێدان دوای بڕیارێکی دادگەی باڵای فیدڕاڵیی عێراق دێت، کە تێیدا یەکلایی کردەوە حکومەتی کاربەڕێکەری عێراق ناتوانێت پڕۆژەبودجەی ساڵی 2022 رەوانەی پەرلەمان بکات و دەبێت حکومەتی نوێ ئەو کارە بکات، بۆیە ئەم پڕۆژەیە پێشکێشکرا.
لە ماددەی یەکەمی پێشنیازەیاساکەدا وەزارەتی دارایی عێراقی پابەندکراوە بە دروستکردنی هەژمارێکی بانکی بەناوی "پشتیوانیی ئاسایشی خۆراک و پەرەپێدان و پارەدارکردنە داراییەکان و کەمکردنەوەی هەژاری".
ماددەی دووەمی یاساکە بڕی ئەو پارەیەی لە چوارچێوەی پێشنیازەیاساکەدا هاتووە دیاریکردووە کە 25 تریلیۆن دینارە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ