مەسرور بارزانی بۆ مەسعود پزیشکیان: بە هیوای قووڵکردنەوەی هاوئاهەنگیی نێوانمان

رۆژی شەممە، 06-07-2024 حکومەتی هەرێمی کوردستان لە راگەیێندراوێکدا پەیامی پیرۆزبایی مەسرور بارزانی، سەرۆکوەزیرانی هەرێمی کوردستان بۆ مەسعود پزیشکیان، سەرۆککۆماری نوێی ئێرانی بڵاوکردەوە و بەپێی راگەیێندراوەکە، مەسرور بارزانی لە پەیامەکەیدا داوای کردووە پەیوەندیی "لەمێژینەی هەرێمی کوردستان و ئێران" بکرێتە زەمینەیەکی لەبار لە پێناو لێکتێگەیشتنی زیاتر و نەهێشتنی هەر کۆسپ و کێشەیەک و جێگیرکردنی پەیوەندییەک کە لە ئاست چاوەڕوانیی هەردوولادا بێت.

 

مەسرور بارزانی بە مەسعود پزیشکیان-ی راگەیاندووە، کە ئەوان وەکو حکومەتی هەرێمی کوردستان، هاوکار دەبن و دەیانەوێت پێکەوە کار بکەن بۆ ئاشتی و "سەقامگیری و پیشکەوتنی زیاتر" لە ناوچەکەدا.

 

بەپێی راگەیێندراوەکەی حکومەت، سەرۆکوەزیران لە پەیامەکەیدا ئاماژەی بەوە کردووە کە خواستی هەرێمی کوردستانە "پەرە بە پەیوەندییە بازرگانی و ئابوورییەکان بدەین بۆ باشترکردنی ئاستی ژیان و گوزەرانی هاووڵاتیانمان."

 

بەیانی ئەمڕۆ مەسرور بارزانی لە پۆستێکدا لە تۆڕی کۆمەڵایەتیی ئێکس پیرۆزبایی لە سەرۆککۆماری نوێی ئێران کردبوو و رایگەیاندبوو، "بە هیوای قووڵکردنەوەی هاوئاهەنگیی نێوانمان لەسەر بنەمای دراوسێیەتی و رێز و بەرژەوەندیی هاوبەش."

 

 

بەرێز دکتۆر مەسعود پزیشکییان

سەرۆکی کۆماری ئیسلامیی ئێران

 

بە ناوی خۆم و حکومەتی هەرێمی کوردستانەوە، گەرمترین پیرۆزباییتان ئاراستە دەکەم بە بۆنەی وەرگرتنی متمانەی گەلانی ئێران و هەڵبژاردنتان وەک نۆیەمین سەرۆکی کۆماری ئیسلامیی ئێران.

 

هیوای سەرکەوتنتان بۆ دەخوازین و ئاواتەخوازین کە پلان و بەرنامەکانی کابینەکەتان، گەشەسەندن و پێشکەتنی زیاتری بۆ گەلانی ئێران لێ بکەوێتەوە و هەروەها پەیوەندییە ئابووری و سیاسی و کولتوورییەکانی کۆماری ئیسلامیی ئێران لەگەل هەرێمی کوردستان و عێراق و تێکڕای ناوچەکە ، بەرەوپێشچوونێکی بەرچاو بەخۆیەوە ببینێت.

 

ئێمە وەک حکومەتی هەرێمی کوردستان، هاوکار دەبین و دەخوازین لە سەر بنەمای ڕێز و دۆستایەتی دوولایەنە، باشترین پەیوەندیمان لە گەل کۆماری ئیسلامیی ئێران هەبێت و پێکەوە کار بکەین بۆ ئاشتی و سەقامگیری و پیشکەوتنی زیاتر لە ناوچەکەماندا و بە تایبەت پەرە بە پەیوەندییە بازرگانی و ئابوورییەکان بدەین بۆ باشترکردنی ئاستی ژیان و گوزەرانی هاووڵاتیانمان.

 

هەرێمی کوردستان و ئێران، پەیوەندییەکی لەمێژینەیان هەیە کە دەتوانرێت ئەم پەیوەندییە بکرێتە زەمینەیەکی لەبار لە پێناو لێکتێگەیشتنی زیاتر و نەهێشتنی هەر کۆسپ و کێشەیەک و جێگیرکردنی پەیوەندییەک کە لە ئاست چاوەڕوانیی هەردوولامان بێت.

 

هەر سەرکەوتووبن و خوای گەورە یار و یاوەر و پاڵپشتتان بێت.

 

مەسرور بارزانی

 

سەرۆکی حکومەتی هەرێمی کوردستان