کۆنتڕۆڵی جۆریی دەرمان: ئەو بەرهەمانەی بۆ دابەزاندنی کێش بە ئۆنڵاین دەفرۆشرێن هۆکارن بۆ شێرپەنجە

 

بەڕێوەبەرایەتیی کۆنتڕۆڵی جۆریی دەرمان لە هەرێمی کوردستان " KMCA"، رۆژی چوارشەممە 05-06-2024  لە راگەیێندراوێکدا ئاشکرایکردووە شیکردنەوە تاقیگەییەکانی دامەزراوەی خۆراک و دەرمان لە ئەمریکا لەناو هەندێک لەو بەرهەمانەی بە ئۆنلاین بۆ دابەزاندنی کێشی لەش دەفرۆشرێن دەرمانی "فینۆڵفسالین"یان دۆزیوەتەوە، کە دەبێتە هۆی شێرپەنجە.

 

بەڕێوەبەرایەتییەکە لەبارەی ئەو جۆرە دەرمانەوە دەڵێت: "فینۆڵفسالین ماددەیەکی دەستنیشانکاری کیمیاییە، لە کارلێکە کیمیاییەکان بەکاردەهێنرێت، لە ئەمریکا هەرگیز وەکو دەرمان مامەڵەی لەگەڵ نەکراوە و لەناو دەرمانە پەسندکراوەکاندا نییە، لە کەنەداش پێشتر وەک رەوانکار بەکاردەهات، بەڵام بەهۆی بوونی بەڵگەی شێرپەنجەیی ئەو ماددەیە، لە ساڵی 1997 لە بازاڕ کشێندرایەوە."

 

بەڕێوەبەرایەتییەکەی هەرێمی کوردستان بۆ ئەو مەبەستە دەڵێت: "هاووڵاتییان پێویستە ئاگاداربن کە ئەو بەرهەمە مەترسیدارانە رەنگە لە رێگەی کەناڵە جیاوازەکانەوە بۆ فرۆشتن پێشکێشبکرێن، لەوانە ئینتەرنێت، بازاڕە گەورەکانی ئۆنلاین، سۆشیال میدیا، ئیمێڵ، پۆست، ساڵۆن، دەرمانخانە، دووکانی گیادەرمانی، بەهاراتفرۆشەکان و کۆگای خۆراک."

 

هۆشدارییش دەدات لەوەی، بەرهەمی دەرمانسازی بۆ چارەسەرکردنی نەخۆشی لەڕێی راوێژی پزیشکی پسپۆڕ وەربگرن و دەرمانیش دوای راوێژی دەرمانساز لە دەرمانخانەکان بکڕن، تەنیا ئەو دەرمانانە بەکاربهێنن کە ستیکەری کۆنتڕۆڵی جۆریی دەرمان – وەزارەتی تەندروستیی حکومەتی هەرێمی کوردستانیان لەسەرە.