لە کەرکووک تەقە لە هاووڵاتییەک دەکرێت و بریندار دەبێت

رۆژی شەممە 06-05-2023، عامر نووری، گوتەبێژی پۆلیسی کەرکووک بە تۆڕی میدیایی رووداوی راگەیاند، شەوی رابردوو بەهۆی کێشەیەکی کۆنی نێوانیان، لە گەڕەکی دۆمیزی شاری کەرکووک تەقە لە هاووڵاتییەکی عەرەب بە ناوی مەحموود عەبدوڵڵا کرا و بریندار بوو. 

 

گوتەبێژی پۆلیسی کەرکووک رەتیکردەوە مەحموود عەبدوڵڵا ئەندامی ئەنجوومەنی ناحیەی رەشاد بێت، وەک ئەوەی لە هەندێک شوێن بڵاوبووەتەوە و گوتی، پێشتر موختار بووە، بەڵام ئێستا لە موختاری نەماوە و "دوای ئەوەی کێشەیەکی بۆ دروستبووە لە رەشادەوە هاتووەتە کەرکووک". 

 

گوتەبێژی پۆلیسی کەرکووک ئاماژەی بەوەکرد، ئەو کەسەی تەقەی لێکردووە ناسراوە و هاوڕێی خۆی بووە، گولـلەکانیش بەر قاچی کەوتوون.