گوتەبێژی لیوای شیمالی هەسەدە بۆ رووداو: هەسەدە چەک دانانێت

 

 

مەحموود حەبیب، ئێوارەی پێنجشەممە، میوانی بوڵتەنی رۆژئاوای کوردستان بوو کە دڵبخوین دارا پێشکێشی دەکرد و وەڵای چەند پرسیارێکی دایەوە.

 

حەبیب گوتی: هێزەکانی سووریای دیموکرات پێشەنگ دەبێت بۆ دامەزراندنی سوپای سووریا و گوتیشی "هەسەدە چەک رادەستی کەس ناکات، بەڵام ئەو تفەنگەی بەدەست هەسەدە-وەیە دەبێتە تفەنگی دەوڵەت."

 

گوتەبێژی لیوای شیمالی هەسەدە لە رەققە ئاماژەی بەوەکرد، "بابەتی کۆکردنەوەی چەک لەژێر کۆنترۆڵی دەوڵەت، کارێکی رەوایە بەڵام چەکەکانمان رادەست بکەین و بگەڕێینەوە ماڵەکانمان، ئەمە کارێکی هەڵەیە و بۆشاییەکانی ئەمنی زۆر مەترسیدار دروست دەکات. رەنگە سووریا بە ئاقارێکی زۆر مەترسیدار ببات."

 

لەبارەی ئەگەری کشانەوەی هێزەکانی ئەمریکاش گوتی: "هیچ هەواڵێکمان پێ نەگەیشتووە سەبارەت بە کشانەوە و نەکشانەوەی هێزەکانی ئەمریکا. ئەوەی لە راگەیاندنەکان و لێدوانەکانی دۆناڵد ترەمپ باسی لێکراوە، لێرە لە ئەرزی واقیعدا پێچەوانەکەی دەبینرێت. ئەو رۆژەی دۆناڵد ترەمپ رایگەیاند، هێزەکانیان لە سووریا دەکشێننەوە، کاروانێکی سەربازی زۆر قەرەباڵخی هێزەکانی ئەمریکا هاتنە ناوەوەی باکوور و رۆژهەڵاتی سووریا."

 

 

 

حەبیب: لە راستیدا دانوستاندنەکان بەردەوامن. لیژنەی تایبەتمەند هەن گفتوگۆ لە هەموو بوارەکان دەکەن بۆ ئەوەی رێککەوتنیان لەبارەوە بکرێت. پرۆسەکە بە باشی بەڕێوەدەچێت. پێویستە چاوەڕێی ئەنجامی دیدار و گفتوگۆکان بکەین کە رەنگدانەوەی ئەرێنی بەسەر گەلی سووریا دەبێت لە سەرانسەری دەوڵەتی سووریادا.

 

 

حەبیب: بێگومان ئێمەش بۆ ئەمە کاردەکەین و پێویستە هەر وابێ، بەهۆی ئەوەی هێزەکانی سووریای دیموکرات، هەرەمی فەرماندەیی هەیە و ئەزموونێکی دوور و درێژی هەیە لە شەڕکردن و بەرەنگاربوونەوەی رێکخراوە تیرۆریستەکان. هەروەها توانای کۆنترۆڵکردنی دۆخی ئەمنی هەیە جا لەسەر سنوورەکان بێت یان لە شار و شارۆچکەکاندا. بۆیە ئەزموونە کەڵەکەبووەکانی هەسەدە گوڕوتینێکی زۆر گرنگ بە سوپای سووریای داهاتوو دەدات. رەنگە ببێتە بنەما و بنچینەیەکی بەهێزی سوپای سووریا، دوای ئەوەی بە لەناوچوونی رژێم بینیمان سوپای سووریا چۆن هەڵوەشایەوە و پەرش و بڵاوبوو. تاوەکو ئێستا لە سووریا هیچ هێزێکی بە دیسپلین و تۆکمە هێندەی هێزەکانی سووریای دیموکرات نییە کە خاوەن فەرماندەیی تۆکمە بێت و ئەرک و بەرپرسیارێتی زۆر گەورەی لەسەر شانە لە ناوچەکانی باکوور و رۆژهەڵاتی سووریا. 

 

 

حەبیب: ئەم بابەتە بە ناوەکانەوە گرێ نەدراوە، گرنگ بەجێگەیاندنی ئەو ئەرک و بەرپرسیارێتییانەیە بۆ ئەم هێزانە. هێزەکانی سووریای دیموکرات بەم ناوە توانی لە ماوەی رابردوودا رێکخراوی تیرۆریستی داعش تێکبشکێنێت. هەروەها لە رووبەرێکی زۆر فراوانی جوگرافیدا ئارامی و ئاسایشی پاراستووە. کاتێک ئەم هێزە دەبێتە بەشێک لە سوپای سووریا، ئەوکات لە بابەتی ناونان و دەستنیشانکردنی ناوێک بۆ هێزەکان ناوەستین. بەلای ئێمە ئەو ئەرک و بەرپرسیارێتییە و بۆچوونە یەکگرتووە کە دەوڵەتی سووریا دەیداتە دەست رۆڵەکانی و جیاکاری لەنێوان کەس ناکات و کەس ڤیتۆ ناکات. بۆیە هێزەکانی سووریای دیموکرات پێشەنگ دەبێت بۆ دامەزراندنی سوپای سووریا. 

 

 

حەبیب: لە چوارچێوەی ئەو ئەرکەی سوپا بەجێی دەگەیێنێت بەتایبەتی پاراستنی ئارامی و سەقامگیری لە سەرانسەری سووریا، ئەو کات هێزەکانی سووریای دیموکرات هیچ لارییەکی نابێت لەوەی ببێتە بەشێک لە پاراستنی ئارامی لە باوەشی جەماوەردا. دەزانین هێزەکانی سووریای دیموکرات لە زۆربەی ناوچەکانی سووریا بە هێزێکی پەسندکراو و خوازراو هەژمار دەکرێت. بۆ نموونە لە سوەیدا، ساحیل و زۆربەی پێکهاتە نەتەوەیی و ئاینییەکانی سووریا. هێزەکانی سووریای دیموکرات هێزێکی پێشوازی لێکراوە و لە توانایدایە ئاشتی و سەقامگیری بەبێ تووندوتیژی و جیاکاری بەدی بهێنیت. بەڵام کاتێک باس لە چۆڵکردنی پێگەکان دەکرێت، ئەمە بابەتێکی جیاوازە و ناکرێت بەمشێوەیە هەنگاوی بۆ بنرێت. هێزەکانی سووریای دیموکرات لە باکووری فورات ئەرکێکی زۆر قورسی لەسەر شانە بۆ پاراستنی ئاسایشی ئەم ناوچەیە. ئەزموونی ئەم هێزە لە توانایدایە ئارامی بۆ تەواوی سووریا فەراهەم بکات. 

 

 

حەبیب: ناونیشانی رادەستکردنی چەک راست نییە، کاتێک تۆ چەک رادەست دەکەیت، دەبیتە کەسێکی سڤیل. هێزەکانی سووریای دیموکرات چەک رادەستی کەس ناکات، بەڵام ئەو تفەنگەی بەدەست هەسەدە-وەیە دەبێتە تفەنگی دەوڵەت ئەم بۆچوونە زۆر رژدە و راست و کاراترە و سوودی بۆ هەموو گەلی سووریا هەیە. بۆ نموونە هێزەکانی سووریای دیموکرات ئەرک و بەرپرسیارێتی گەورەی لەسەر شانە لە باکوور و رۆژهەڵاتی سووریا. ئەگەر هەسەدە چەکەکانی رادەستی لایەنێک بکات، کام هێز ئەو ئەرکە بەڕێوەدەبات کە هەسەدە دەیکرد؟ حکومەتی دیمەشق ئەگەر مەبەستیەتی ئەم کارە بکات لانیکەم پێویستی بە 30 هەزار چەکدارە. ئایا ئەم قەبارە گەورەیەی هێزی هەیە بۆ ئەوەی ئەرکی هێزەکانی سووریای دیموکرات جێبەجێ بکات؟ بابەتی کۆکردنەوەی چەک لەژێر کۆنترۆڵی دەوڵەت، کارێکی رەوایە بەڵام چەکەکانمان رادەست بکەین و بگەڕێینەوە ماڵەکانمان، ئەمە کارێکی هەڵەیە و بۆشاییەکانی ئەمنی زۆر مەترسیدار دروست دەکات. رەنگە سووریا بە ئاقارێکی زۆر مەترسیدار ببات. ئێمە هەموو توانایەکمان خستووەتەڕوو بۆ پاراستنی ئارامی و سەقامگیری ناوچەی باکوور و رۆژهەڵاتی سووریا. چەکی ئێمە هەمیشە لە خزمەتی ئەم دەوڵەت و گەلە دەبێت جا ببینە بەشێک لە وەزارەتی بەرگریی سووریا یان بۆ پاراستنی خاکی سووریا ئەرکدار بکرێین. 

 

 

حەبیب: ئێمە هەمیشە بەدوای دەرەنجام دەگەڕێین، ئایا ئەو بابەتانەی باس دەکرێن، دەرەنجامی باشی بۆ ناوچەی باکوور و رۆژهەڵاتی سووریا و تەواوی سووریا دەبێت؟ ئێمە هێزێکی تۆکمەی خاوەن دیسپلین و توانا و بە ئەزموونین. بە لای ئێمەوە زۆر گرنگە دەستکاری پێکهاتەی هێزەکانی سووریای دیموکرات نەکرێت بۆ ئەوەی کەسانی دیکە نەخزێنە نێو پێکهاتەی فەرماندەییەکەیەوە و تووشی کێشە نەبێت. با هێزەکانی سووریای دیموکرات وەک خۆی بمێنیت و ئەرکی پاراستنی ناوچەی باکوور و رۆژهەڵاتی سووریا بێت. کاتێک دەبینە بەشێک لە پێکهاتەی وەزارەتی بەرگریی ئەوسا رێگە بۆ زۆر شت خۆش دەکرێت وەک بەشداریکردنی لایەنەکانی دیکەش و دابەشکردنی رۆڵ و بەرپرسیارێتی بۆ پاراستنی سەقامگیری تەواوی سووریا لە چوارچێوەی سوپای سووریا و لەژێر رۆشنایی یاسا کارپێکراوەکانی ئەو ساتەی سووریا. 

 

 

حەبیب: هیچ هەواڵێکمان پێ نەگەیشتووە سەبارەت بە کشانەوە و نەکشانەوەی هێزەکانی ئەمریکا. ئەوەی لە راگەیاندنەکان و لێدوانەکانی دۆناڵد ترەمپ باسی لێکراوە، لێرە لە ئەرزی واقیعدا پێچەوانەکەی دەبینرێت. ئەو رۆژەی دۆناڵد ترەمپ رایگەیاند، هێزەکانیان لە سووریا دەکشێننەوە، کاروانێکی سەربازی زۆر قەرەباڵخی هێزەکانی ئەمریکا هاتنە ناوەوەی باکوور و رۆژهەڵاتی سووریا. هەروەها هێزەکانی هاوپەیمانان بە تەنیا ئەمریکا نییە، بەڵکو لە بەریتانیا، فەرەنسا و ئەڵمانیا-ش پێکدێن. ژمارەیەکی زۆری وڵاتانی دیکەش هەن. ئەگەر ئەمریکا ژمارەی سەربازەکانی کەم بکاتەوە یان بکێشێتەوە، هێزەکانی فەرەنسا و بەریتانیا ئامادەییان هەیە. کەواتە هیچ گۆڕانکارییەک لە نەخشەی دابەشبوونی هێزەکانی هاوپەیمانان نەکراوە. ئەمە جگە لەوەی دۆخی ناوچەکە بەرگەی کشانەوەی هێزەکانی هاوپەیمانان و ئەمریکا ناگرێت، بەهۆی ئەوەی مەترسی سەرهەڵدانەوەی داعش لە ئارادایە. رەنگە تورکیا ئەمە بقۆزێتەوە و بە ئۆپەراسیۆنێکی سەربازیی فراوانەوە ئەم ناوچەیە داگیر بکات. هەروەها ئەگەری گرژی و ئاڵۆزی زۆری هەیە بەهۆی ئەوەی دۆخی هەرێمیش هێشتا ناجێگیرە. تاوەکو ئێستا پرسی غەززە و لوبنان چارەسەر نەکراوە بۆیە بوونی هێزەکانی ئەمریکا زامنە بۆ هاوپەیمانانی لە سەرووی هەمووشیانەوە هێزەکانی سووریای دیموکرات. 

 

 

لە ئەلف و بێی زانستی سەربازیدا ناکرێت ژمارەی سەرباز و نهێنییەکانی دیکە ئاشکرا بکرێت. دەتوانم بڵێم هێزەکانمان پێکهاتەیەکی تەواو تێکەڵە لە عەرەب و کورد و ئاشوور و سریان و تورکمان. هێزەکانی سووریای دیموکرات توانیوویەتی ببیتە چەتری کۆکەرەوەی هەموو ئەم پێکهاتانە و لەیەک بەرەدا پێکەوە بۆ پاراستنی ئاسایش و سەقامگیری ناوچە کار دەکەن. بۆیە گرنگ نییە ژمارەکەی چەندە یان رێژەی پێکهاتەکان چەندە؟ گرنگ ئەوەیە هێزەکانی سووریای دیموکرات لە 10 ساڵی رابردوودا خۆڕاگر بووە لە دژی دڕندەترین و بەهێزترین رێکخراوی تیرۆریستی کە داعش بوو. هەروەها بەرەیەکی بەهێزی رووبەڕووبوونەوەی داگیرکاری تورکیا بوو.