رووداو دیجیتاڵ
دوای بڕیارێکی سەرۆکوەزیران بۆ دامەزراندنی 500 کەس لە سنووری پارێزگای هەڵەبجە و جیاکردنەوەی ناوەکان، تاوەکو ئەمڕۆ دەستبەکار نەبوون. جێگری پارێزگاری هەڵەبجە دەڵێت، ناوی ئەوانەی دادەمەزرێن لە ئەنجوومەنی وەزیرانە و لە دوایین قۆناخەکاندایە.
شاهین رەزا، جێگری پارێزگاری هەڵەبجە رۆژی پێنجشەممە، 05-12-2024، بە تۆڕی میدیایی رووداوی گوت: "ناوی ئەو کەسانەی بڕیارە دابمەزرێن لەم هەفتەیەدا لە ئەنجوومەنی راژەوە نێردراوە بۆ ئەنجوومەنی وەزیرانی هەرێمی کوردستان و ئێستا لە بەردەستی ئەواندایە".
بە گوتەی شاهین رەزا، کێشە بۆ دامەزراندنی ئەو کەسانە دروستنەکراوە و رێکارە کارگێڕییەکانی بەڕێوەدەچن. گوتیشی: "دوای گەڕانەوەی ناوەکان لە ئەنجوومەنی وەزیرانەوە، هەر رێکارێک پێویستبێت دەیگرینە بەر بۆ ئەوەی زوو دەستبەکاربن".
22ی شوباتی 2024 مەسرور بارزانی، سەرۆکوەزیرانی هەرێمی کوردستان سەردانی شاری هەڵەبجەی کرد و لەگەڵ بەرپرسانی کارگێڕیی سنوورەکە کۆبووەوە. دواتر حکومەتی هەرێمی کوردستان راگەیێندراوێکی شەش خاڵیی بڵاوکردەوە و لە خاڵێکدا رایگەیاند، سەرۆکوەزیران بڕیاری دامەزراندنی 500 کەسی بە شێوەی گرێبەست بۆ پارێزگاکە داوە.
دوای بڕیارەکەی سەرۆکوەزیران، حوزەیرانی ئەم ساڵ بەشێوەی ئەلیکترۆنی داواکاری دامەزراندنەکە پڕکرایەوە و دواتر 500 ناو بەگوێرەی مەرجەکان هەڵبژێردران.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ