تەقینەوەیەک لە کەرکووک روویدا و پێنج کەس بریندار بوون

 

رۆژی شەممە، 05-10-2024 تەندروستیی کەرکووک ئاماری قوربانییانی تەقینەوەکەی بڵاوکردەوە و رایگەیاند: "پێنج کەس بریندار بوون یەکێکیان برینەکەی سووکە، کەسی پێنجەم، خێزانی خاوەنی نووسینگەی ئاڵۆگۆڕی دراوەکەیە."

 

عامر نووری، گوتەبێژی پۆلیسی کەرکووک بە تۆڕی میدیایی رووداوی گوت، لە نزیک نووسینگەیەکی ئاڵوگۆڕکردنی دراو لە گەڕەکی موسەڵای شاری کەرکووک بۆمبێک تەقییەوە و بەو هۆیەوە چوار کەس بریندار بوون.

 

گوتەبێژی پۆلیسیی کەرکووک گوتی، هێزە ئەمنییەکان گەیشتوونەتە شوێنی رووداوەکە و لێکۆڵینەوە دەستیپێکردووە.

 

لە سەرەتای رووداوەکە پۆلیسی کەرکووک ئاماژەی بە چوار بریندار کرد، بەڵام تەندروستیی شارەکە دەڵێت. "ژمارەی بریندارەکان پێنج کەسن"، بەڵام یەکێکیان "برینەکەی سووکە" بە پارچەی تەقینەوەکە بریندار بووە بۆیە لە راپۆرتی هێزە ئەمنییەکاندا نەهاتووە.

 

شایەتحاڵێک لە شوێنی رووداوەکە دەڵێت: "ماڵەکەم لە شوێنی رووداوەکە نزیکە کاتێکمان زانی دەنگێکی گەورە هات، نەمانزانی چی بوو کاتێک هاتین چەند کەسێک بریندار بوون، نازانین هۆکارەکەی چی بووە." 

 

موختاری گەڕەکی موسەڵای کەرکووک بۆ رووداو قسەی کرد و رایگەیاند: "یەکێک لە بریندارەکان یەکێک لە قاچەکانی پەڕیوە، نزیکەی پێنج کەس بریندارن، ئەمە رووداوێکی تیرۆریستییە."

 

هەردی محەممەد، پەیامنێری رووداو لە تەندروستیی کەرکووکەوە ناسنامەی بریندارەکانی دەستکەوتووە و بەمشێوەیەیە، "یەکێک لە بریندارەکان ناوی جەبار مەحموودە، کارمەندی تەندروستییە برینەکەی سووکە، لەیس ئەیاد سەلووم، برینداری دووەمە، دانیشتووی گەڕەکی مووسەڵایە و کاسبکارە، لەدایکبووی 1990ـە. رەعد سەمیم فارس، برینداری سێیەمە و خەڵکی گەڕەکی قادسییەیە و لەدایکبووی 1975ـە، برینداری چوارەم خاوەنی نووسینگەی ئاڵوگۆڕی دراوەکەیە، ناوی سایغن حسامەدین زەین عەبدینە، لەدایکبووی ساڵی 1968ـە بەهۆیەوە قاچێکی بڕاوەتەوە. کەسی پێنجەمی، خێزانی خاوەنی نووسینگەی ئاڵوگۆڕی دراوەکەیە لەدایکبووی 1961ـە و فەرمانبەرە."