کەشناسی: سبەی لە گەرمیان بەرزترین پلەی گەرما تۆمار دەکرێت

 

رۆژی چوارشەممە 05-07-2023 بەشی کەشناسی لە وەزارەتی گواستنەوە و گەیاندن لەبارەی کەشوهەوای سبەی رایگەیاند، ئاسمان ساماڵ و گەرم دەبێت و بەرزترین پلەی گەرما لە گەرمیان تۆماردەکرێت، کە 48 پلەی سیلیزییە و نزمترینیش لە حاجی ئۆمەران کە 32 پلەی سیلیزییە.

 

ئاراس جەبار، کە شارەزای کەشناسییە بە تۆڕی میدیایی رووداوی گوت "سبەی و دووسبەی بەرزترین پلەی گەرما تۆمار دەکرێت، بەگوێرەی پێشبینییەکانمان پلەی گەرما تاوەکو 49 پلەی سیلیزی و رەنگە زیاتریش بەرزببێتەوە، لە گەرمیان پێشبینی دەکرێت پلەی گەرما تاوەکو 49 پلە و لە هەولێر تاوەکو 48 پلە تۆمار بکرێت، بەڵام رۆژی شەممە 8ـی ئەم مانگە ئەو شەپۆلە گەرمایە کەمتر دەبێتەوە و پلەی گەرما یەک بۆ دوو پلە نزم دەبێتەوە".

 

بەپێی پێشبینییەکانی کەشناسیی هەرێمی کوردستان، سبەی (پێنجشەممە) بەرزترین پلەی گەرمای پێشبینیکراو بە پلەی سیلیزی بەمشێوەیە دەبێت:

 

هەولێر: 45 پلەى سیلیزى

سلێمانی: 44 پلەى سیلیزى

دهۆک: 44 پلەى سیلیزى

کەرکووک: 47 پلەى سیلیزى

هەڵەبجە: 46 پلەى سیلیزى

حاجی ئۆمەران: 32 پلەى سیلیزى

زاخۆ: 45 پلەى سیلیزى

سۆران: 44  پلەى سیلیزى

گەرمیان: 48 پلەى سیلیزى