لە سلێمانی پارەی خۆڵ و خاشاک لە ماڵان وەردەگیرێت

 

 

زەردەشت رەفیق، بەرپرسی راگەیاندنی سەرۆکایەتیی شارەوانیی سلێمانی بە رادیۆی رووداوی راگەیاند: "شارەوانی پارەی کۆکردنەوەی خۆڵ و خاشاک لە ماڵان وەردەگرێت کە بۆ هەر مانگێک پێنج هەزار دینارە. ئەمە پێی دەگوترێت داهاتی خۆڵ و خاشاک، بەڵام وابزانم ئەم بڕیارە لە هەولێر نەچووتەوە بواری جێبەجێکردنەوە و تەنیا لە سلێمانی دەستی پێکراوە."

 

بەپێی بڕیارێکی ئەنجوومەنی وەزیران دەبێت بۆ کۆکردنەوەی خۆڵ و خاشاک پارە لەو شوێنانە وەربگیردرێت کە پاشماوەیان هەیە کە ماڵان، دووکان و شوێنەکانی سەر بە کەرتی تایبەت دەگرێتەوە.

 

بەرپرسی راگەیاندنی سەرۆکایەتیی شارەوانیی سلێمانی گوتی: "ئەم پارەیە دەچێتەوە بۆ داهاتی وەزارەتی دارایی و هیچ پەیوەندیی بە شارەوانییەوە نییە بۆ ئێمە ناگەڕێتەوە. ئەوەی لە کۆمپانیاکانەوە بیستوومە، هەندێک هاووڵاتی هەن ناتوانن ئەم پارەیە بدەن. مافی خۆیشیانە کە لەم قەیرانی داراییەدا نەتوانن."

 

سلێمانی کراوە بە چەند ناوچەیەکەوە و لە رێگەی ژمارەیەک کۆمپانیاوە ئەو داهاتی خۆڵ و خاشەکە کۆ دەکرێتەوە.